Xatırlayırsınızsa, bir neçə dəfə Səməd Vurğun adına Sumqayıt şəhər Mərkəzi Kitabxanasının ətrafında tikinti qaydalarına uyğun olmayan şəkildə inşa olunan obyektlərdən bəhs etmişdik. Belə ki, kitabxananın yan hissəsində lüzumsuz şəkildə tikilən qanunsuz avtoyuma məntəqəsindəki aparatların səsi, bəzən səs-küy, ön hissəsində - dayanacağın yanında isə nəhəng tikilinin bu mədəniyyət ocağının qarşısını kəsməsi dövlət idarəsinin normal fəaliyyəti üçün əngəl yaradırdı. Dəfələrlə oxu zalında mütaliə edənlər, kitabxananın işçiləri bu məsələ ilə bağlı portalımıza və müvafiq idarələrə şikayət etsələr də, konkret tədbir görülmürdü. Bildiyiniz kimi bir neçə gün öncə Xeberle.com-da "Sumqayıtın qanunsuz tikilən obyektləri: zəbt olunmuş xiyaban və səkilər, kəsilən yollar" mövzusunda hazırladığımız araşdırma yazıda şəhərin memarlıq görkəminə, tikinti qaydalarına zidd olaraq tikilən obyektlərin bir neçəsinin adını çəkəndə məhz bu avtoyuma məntəqəsindən də bəhs etmişdik. Xoş bir haldır ki, artıq həmin obyekt söküldü.
Ötən gün Sumqayıt şəhər İcra Hakimiyyətinin başçısı  Zakir Fərəcov şəhərin mədəniyyət müəssisələrinə növbəti baxış zamanı S.Vurğun adına Mərkəzi kitabxanada olub. Kitabxananın fondu, oxucusu, iş şəraiti ilə tanış olan icra başçısı vaxtilə oxucusu olduğu bu elm məbədgahının bugünkü vəziyyətini bəyəndiyini bildirib. Oxucuları və kitabxana əməkdaşlarını narahat edən problemlərlə də maraqlanan Zakir Fərəcov həm kitabxana, həm də ətraf sakinlər üçün narahatlıq yaradan bəzi obyektlərin dərhal sökülməsinə göstəriş verib.
Bu gün  artıq günorta saatlarında icra başçısı Zakir Fərəcovun tapşırığına əsasən avtoyuma məntəqəsi "tarixin arxivinə qovuşub".

Ümid edirik ki, tezliklə sıra bu kitabxananın qarşısını kəsən, avtomobil yolunun bir neçə addımlığında tikilən hündür obyektə də çatacaq. Bir neçə ay bundan öncə tikilən sözügedən obyekt həm də tam fəaliyyətsizdir, bir çox oxşar sitausaiyalardakı kimi bunun da şüşəsinə "İcarəyə verilir” sözü yazılıb. Sumqayıt ictimaiyyəti bu obyektin də sökülməsinin tərəfdarıdır.
Elnur Ağayev
Xeberle.com