"Əlil Sahibkarlar Təşkilatı” İctimai Birliyinin sədri Mirzə Məmmədvəliyev, "Vətəndaşların Sosial Rifahının Gücləndirilməsinə Dəstək” İctimai Birliyinin sədri Venera Əsgərova və Azərbaycan-İsrail Beynəlxalq Tibb Mərkəzinin rəhbəri, sülhməramlı səfir, Aleksander Şapiro Suliman İsmayıllı rayonuna səfərləri çərçivəsində İcra hakimiyyətinin başçısı Mirdamət Sadıqovla görüşüblər.

"Əlil Sahibkarlar Təşkilatı” İctimai Birliyinin Mətbuat xidmətindən Xeberle.com-a verilən məlumata görə qonaqları rəhbərlik etdiyi rayonda görməkdən məmnunluğunu ifadə edən Mirdamət Sadıqov İsmayıllıda aparılan abadlıq-quruculuq işləri barəsində geniş məlumat verib. İcra başçısı qeyd edib ki, respublikada əlilliyin səviyyəsi, reabilitasiya işinin vəziyyəti onlara göstərilən diqqət və qayğı bir çox hökumət və qeyri-hökumət təşkilatlarının, aidiyyəti nazirliklərin birgə fəaliyyətindən çox asılıdır. O, əlillərin, şəhid ailələri və müharibə veteranlarının sosial müdafiəsinin Prezident İlham Əliyev tərəfindən diqqət mərkəzində saxlanıldığını və bu sahədə kifayət qədər işlərin görüldüyünü vurğulayıb.

İcra başçısı rayonda əlillərin sosialaşması, rifahının yaxşılaşdırılması, cəmiyyətə inteqrasiyası ilə bağlı bütün məsələlərin diqqət mərkəzində olduğunu və onlara hər bir işdə dəstək verdiyini qonaqların nəzərinə çatdırıb.

O, "Əlil Sahibkarlar Təşkilatı” İctimai Birliyinin sədri Mirzə Məmmədvəliyevə və digər qonaqlara Azərbaycan-İsrail Beynəlxalq Tibb Mərkəzinin təşkilatçılığı ilə İsmayıllı rayonundan olan 22 nəfər fiziki əngəlli insanın pulsuz tibbi müayinəsini təşkil etdikləri üçün minnətdarlığını bildirib.

"Əlil Sahibkarlar Təşkilatı” İctimai Birliyinin sədri Mirzə Məmmədvəliyev öz növbəsində icra başçısına səmimi qəbula görə təşəkkür edib və rəhbərlik etdiyi təşkilatın İsmayıllı rayon şöbəsinin artıq fəaliyyətə başladığını bildirib. M.Məmmədvəliyev Azərbaycan-İsrail Beynəlxalq Tibb Mərkəzinin dəstəyi ilə indiyədək 1000-ə yaxın əlilin tibbi müayin'dən keçirildiyini diqqətə çatdırıb. O, qeyd edib ki, İsmayıllı rayonunda əlillərin həyat şəraitinin yaxşılaşdırılması istiqamətində bir sıra sosial layihələr həyata keçiriləcək.

"Vətəndaşların Sosial Rifahının Gücləndirilməsinə Dəstək” İctimai Birliyinin sədri Venera Əsgərova və Azərbaycan-İsrail Beynəlxalq Tibb Mərkəzinin rəhbəri, sülhməramlı səfir, Aleksander Şapiro Suliman da çıxış edərək göstərilən diqqət və qayğıya görə rayon rəhbərliyinə minnətdarlıqlarını bildiriblər.
Aleksander Şapiro Suliman İsmayıllı rayonuna böyük önəm verdiklərini və gələcəkdə rayonda Əlillərin Reabilitasiya Mərkəzinin tikilməsi istiqamətində əməli tədbirlər həyata keçiriləcəyini icra başçsının diqqətinə çatdırıb. O, bu mərkəzin əlillərin yüksək səviyyədə müalicəsinə və cəmiyyətə interqrasiyasında mühüm rol oynayacağını vurğulayıb. A.Ş.Suliman rayon rəhbərliyinin mərkəzin bu xoşniyyətli layihəsinə dəstək verəcəyinə əminliyini ifadə edib.
M. Sadıqov öz növbəsində bildirib ki, bütün sosial təşəbbüslərin reallaşmasında İsmayıllı rayonunun rəhbərliyi yaxından iştirak edəcək və bütün lazımi tədbirlər həyata keçiriləcək. O, İsmayıllıda Əlillərin Reabilitasiya Mərkəzinin tikintisi üçün münbit yer ayrılacağını da sözlərinə əlavə edib.
Görüşdə, həmçinin qarşılıqlı əməkdaşlığın yolları ilə bağlı geniş fikir mübadiləsi aparılıb, gələcək planlardan söz açılıb, bu fəaliyyətlərin həyata keçirilməsinin zəruriliyi vurğulanıb.

"Əlil Sahibkarlar Təşkilatı” İctimai Birliyinin Sumqayıt şöbəsinin sədri Mədaxil Cavadlı İsmayıllı rayonunun tarixi abidələrindən bəhs edən müəllifi olduğu kitabları İcra başçısı Mirdamət Sadiqova hədiyyə edib.

Sonda fiziki əngəlli insanların əl işlərindən ibarət sərgiyə baxış keçirilib.