Nardaran qəsəbəsinin mərkəzi meydanında polis bölməsi üçün inşa edilən inzibati bina istifadəyə verilib.

APA-nın məlumatına görə, Sabunçu rayon İcra Hakimiyyəti rəhbərliyinin və digər rəsmi şəxslərin iştirakı ilə 42-ci Polis Bölməsinin açılışı olub.

Bildirilib ki, polis bölməsinin şəxsi heyəti formalaşıb və bölmənin rəisi vəzifəsinin icrası müvəqqəti olaraq polis polkovniki Azər Cahangirova həvalə edilib.
Xeberle.com-un məlumatına görə, Azər Cahangirov iki il bundan öncə Sumqayıt Şəhər Polis İdarəsinin əməliyyat işləri üzrə rəis müavini vəzifəsində çalışıb. Polis polkovniki Azər Cahangirov 2013-cü ilin noyabrında Daxili İşlər Nazirliyinin rəhbərliyinə raportla müraciət edərək işdən azad edilməsini xahiş edib. Raportu əsasında tutduğu vəzifədən azad edilən A. Cahangirov bir neçə ay sərəncamda olub.
Daxili işlər naziri, general-polkovnik Ramil Usubovun əmri ilə polis polkovniki Azər Cahangirov Baş Cinayət Axtarış İdarəsinə təyinat almışdı.