Sumqayıtın mərkəzində iki yeni biznes mərkəzinin inşası başa çatmaq üzrədir.
Hazırda binada daxili işlər tamamlanmaq üzrədir. Ancaq binaların kimin sifarişi ilə tikildiyi sirr olaraq qalır.
"Novosti Azərbaycan" agentliyinin əməkdaşı bu binaların kimə məxsus olduğu ilə maraqlanıb. İş icraçılarının heç biri suala dəqiq cavab verə bilməyiblər.
"Bu binaların tikintisinin sifarişçisi "Texnika Bank"ın yerli filialı idi. Ancaq bank bağlanandan sonra tikinti işləri də dayanmışdı. Bir il sonra tikinti işləri yenidən bərpa olundu. Ancaq indi heç kim bilmir ki, sifarişçi kimdir", - iş icraçılarından biri agentliyin əməkdaşına bildirib.
Şəhərin memarlıq və şəhərsalma idarəsində isə deyiblər ki, binanın tikintisində sifarişçi "Bank Texnik"dir.
"Bank Texnik"in Sumqayıt filialından isə bildiriblər ki, həmin tikililərin banka heç bir aidiyyəti yoxdur.
"Sifarişçi "Texnika Bank" idi. Ancaq bankın strukturunda dəyişikliklər edildikdən və adı "Bank Texnik"ə dəyişdirildikdən sonra tikililər icra hakimiyyətinə verilib".
Sumqayıt şəhərinin baş mühəndisi Kənan Babayev isə deyib ki, tikililərin bə banka, nə də ki icra hakimiyyətinə aidiyyəti yoxdur. Binaların sifarişçisi adı açıqlanmayan türkiyəli iş adamıdır. (milli.az)
Xəbərdən istifadə edərkən istinad etmək vacibdir.
