"Yüksək səsyayıcı qabiliyyətə malik pirotexniki partlayıcı maddələrin satışı ölkədə qadağan olunduğu halda bu cür mallar Sumqayıtda günün günorta çağı açıq-aşkar satılır".
Xeberle.com xəbər verir ki, bu barədə moderator.az-a göndərilən müraciətdə bildirilir.
Müraciətdə qeyd edilir ki, bu cür səyyar satışın özü də qadağandır: "Hörmətli redaksiya, sizə göndərdiyim şəkillər dünən günorta saatlarında Sumqayıt şəhərindəki "Nizami” parknda və Sülh küçəsində çəkilib. Maraqlıdır ki, görəsən doğrudanmı hüquq-mühafizə orqanları partlayıcı maddələrin bu qanunsuz satışını görmür?! Ümumiyətlə bu mümkündürmü polis bunu görməsin?! Üstəlik bu cür səyyar satış özü də qanunla qadağandır.
Bu işi görən şəxslər vergi ödəmirlər və bu da başqa bir qanunsuzluqdur. Maraqlıdır ki, Sülh küçəsində partlayıcı maddələri deyəsən yeniyetmə qızlar satır. Hər halda görüntülərdən belə görünür ki, piştaxta arxasında onlardır. Bu şəhərin yalnız bir yerində müşahidə olunan görüntülərdir. Çox guman ki, şəhərin təkcə bir yerində deyil, digər yerlərində də partlayıcı maddələr belə şəkildə satılır. Yəqin ki, bayram günlərində bu cür satış nöqtələri daha da artacaq. Əlbəttə ki, əgər müvafiq orqanlar bu cür özbaşnalığa göz yummaqda davam etsə.
Amma məlumatlarda oxuyuruq ki, Gömrük Komitəsinin əməkdaşları, polis işçiləri orda-burda külli miqdarda yüksək səsyayıcı qabiliyyətə malik pirotexniki vasitə aşkar edilərək götürür, müsadirə edir, filan-beşməkan...
Demək belə çıxır bu qanunlar Sumqayıta aid deyil ?!"
Qeyd edək ki, Dövlət Gömrük Komitəsinin internet saytında yer alan məlumata görə, 23 dekabr, 2003-cü il tarixli, 565 saylı qanuna əsasən partlayıcı maddə və qurğuların, eləcə də tezalışan maddələrin və pirotexniki vasitələrin mülki dövriyyəsi tamamilə məhdudlaşdırılıb. Yalnız xüsusi icazə əsasında idxalına yol verilən bu tip qurğu, maddə və məmulatların vətəndaşlar tərəfindən ölkə ərazisinə gətirilməsi, satışı və istifadəsi qanunla qadağan olunub. Buna baxmayaraq ölkədə həmişə, xüsusən də bayramlar ərəfəsində belə vasitələrin açıq satışına rast gəlmək olur. Elə indi də Yeni il bayramı ərəfəsində yolka və digər bayram aksessuarları satılan mağazaların əksəriyyətində pirotexniki maddələrin satışını müşahidə edilir. İstifadəsi yüksək səs-küylə müşayiət olunan, insan sağlamlığı üçün təhlükə törədən pirotexniki və tezalışan malların satışı aşkarlandığı halda İnzibati Xətalar Məcəlləsinin 224-cü maddəsinə əsasən fiziki şəxslər üçün buna görə 350-500 manat, vəzifəli şəxslər üçün isə 1650-2200 manat məbləğində cərimə də nəzərdə tutulub.
Xəbərdən istifadə edərkən istinad etmək vacibdir.
