Xəbər verdiyimiz kimi Sumqayıtda yaşayış binalarının girişlərində, iki bina arasında tikilmiş obyektlər, eləcə də obyektlərin küçəyə olan hissələrində olan pilləkənləri sökülür. Söküntü işinə 13-cü mikrorayondan başlanılıb. Belə ki, dünən mikrorayonun 2, 3 və 4 saylı binalarının girişlərində olan, sakinlərin yolunu kəsən, memarlıq və şəhərsalma qaydalarına zidd tikilən, həmçinin sənədsiz olan obyektlər sökülüb. 

Sumqayıt şəhər İcra Hakimiyyətindən aparılan söküntü ilə bağlı Xeberle.com-a açıqlama verilib. Açıqlamada bildirilir ki, söküntü işləri qanunauyğun şəkildə aparılır və sökülən obyektlərin sənədləri mövcud deyildir: "Məhz bu səbəbdən bu obyektlər sökülür. Sənədləri qaydasında olan heç bir obyekt sökülməyəcək və sahibkarlar bundan narahat olmasınlar. Ərazidə - Üzeyir Hacıbəyov küçəsi, 62a ünvanında yerləşən İlham Abdilova məxsus aptek sökülməyəcək. Həmin aptekin qarşısında qanunsuz olan yarımçıq tikili də yaxın vaxtlarda söküləcək. Bu söküntüdən aptek də zərər çəkə bilər. Ona görə də aptek sahibinə obyekti müvəqqəti boşaltması tövsiyə olunub.”
Xeberle.com