Azərbaycanda yüksək vəzifələr tutan məmurların, digər sahələrdə tanınmış simaların övladları ilə bağlı məlumatlar tez-tez media vasitəsilə gündəmə gəlir, kimisi haqda yaxşı sözlər danışılır, kimisi barədə isə əksinə... 

Cəmiyyətin bütün təbəqələri kimi, vəzifəli şəxslərin, digər məşhurların övladları arasında nümunəvi davranışları ilə seçilənlər də var və təbii ki, bunun əksinə olanlar da... 

Ümumiyyətlə məmurların və məşhurların övladları haqqında bilgilər ictimaiyyətə də həmişə maraqlı gəlib - onlar kimdirlər, harda çalışır, nə işlərlə məşğuldurlar, neçə yaşları var... 

Modern.az saytı “Məşhurların övladları” adlı rubrikasında ictimai, siyasi xadimlərin, mədəniyyət, ədəbiyyat, idman, media və digər sahələrdə tanınmış simaların övladları haqda bilgilərin təqdimatını davam etdirir. 

Budəfəki təqdimatımız ANS Şirkətlər Qrupunun vitse-prezidenti, Azərbaycanın istedadlı telejurnalisti Mirşahin Ağayevin övladları barəsindədir. 

Əməkdar jurnalist Mirşahin Ağayevin əlavə təqdimata ehtiyacı olmasa da, yenə də xatırladırıq ki, 51 yaşlı telejurnalist ANS TV-nin yaradıcılarından biridir. 
Mirşahin jurnalistikaya 1988-ci ildə Sabir Rüstəmxanlının “Azərbaycan” qəzeti ilə başlayıb. Daha sonra Vahid və Çingiz Mustafayev qardaşları ilə birləşərək ANS televiziyasını yaradıblar. 
Bu gün ANS-in adı çəkiləndə orada çalışan telejurnalistlərdən ilk ağıla gələn Mirşahin Ağayevin adı olur. “Mən ANS-in bir parçasıyam. Bir gün ANS olmasa, yəqin ki, Mirşahin də olmayacaq. Bilmirəm ANS bağlansa, sonrakı həyatı necə yaşayaram?”-deyə o, müsahibələrinin birində deyib
Məhşur telejurnalist 3 övlad atasıdır, iki oğlan və bir qız.

Mirşahin Ağayevin böyük oğlu Mirtəyyar Ağayev 2012-ci ildə 175 nömrəli məktəbi bitirib.

Kiçik oğlu Mirçingiz isə bu il 175 nömrəli məktəbi bitirib. O, bu il ali məktəbə sənəd verib və 3-cü qrup üzrə qəbul imtahanlarında iştirak edəcək.

Mirşahin Ağayevin övladlarının ən kiçiyi qızı Aysandır. 2012-ci il mayın 14-də dünyaya gəlmiş Aysan bir ay öncə 3 yaşına keçib. Aysanın anası Səbinə Heydərova da telejurnalistdir. ANS TV-də İç xəbər” verilişinin aparıcısıdır.