Azərbaycan Respublikasının Prezidenti yanında Gənclər Fondunun maliyyə dəstəyilə Sara Fərzəliyeva tərəfindən həyata keçirilən "Dövlət atributlarını tanıyaq və tanıdaq!” layihəsinin icrası davam edir.

Layihə çərçivəsində Sumqayıt şəhərində 4 nömrəli tam orta məktəbdə növbəti tədbir keçirilib.

Layihə rəhbəri Sara Fərzəliyeva tədbiri giriş sözü ilə açaraq layihənin məqsədi barədə məlumat verib. S. Fərzəliyeva layihənin donoru olan Gənclər Fondu və onun yaranmasından, prezident İlham Əliyevin yürütdüyü gənclər siyasətindən danışıb.

Təlimçi Anar Həsənli dövlət atributlarımız və onların yaranma tarixi haqqında danışıb. Himnimiz sözləri və musiqisi, bayrağımızın rəngləri və mənası, həmçinin gerbimizin simvolları və onların mənaları haqqında ətraflı məlumat verən təlimçi şagirdləri dövlət atributlarımıza qarşı diqqətli və hörmətlə yanaşmağa səsləyib.

Sonda tədbir iştirakçılarına layihə çərçivəsində hazırlanmış maarifləndirici bukletlər paylanılıb, şagirdlərə dəftərxana ləvazimatları hədiyyə edilib.