İsmayıllı rayonunda 20 Yanvar Ümumxalq hüzn gününə həsr olunmuş tədbir keçirilib. Tədbir İsmayıllı rayon İcra Hakimiyyətinin, "Əlil SahibkarlarTəşkilatı” ictimai birliyinin (ƏSTİB), "Vətəndaşların Sosial Rifahının Gücləndirilməsinə Dəstək" İctimai Birliyinin (VSRGD İB) və "Şirvanşahlar Saray Kompleksi” Dövlət Tarix-Memarlıq Qoruq Muzeyinin təşkilatçılığı ilə baş tutub. 

ƏSTİB-in Mətbuat xidmətindən Xeberle.com-a verilən məlumata görə tədbirdən öncə İsmayıllı rayon İcra Hakimiyyətinin Başçısı Mirdamət Sadıqov, "Əlil Sahibkarlar Təşkilatı” ictimai birliyinin sədri Mirzə Məmmədvəliyev, "Vətəndaşların Sosial Rifahının Gücləndirilməsinə Dəstək" İctimai Birliyinin sədri Venera Əsgərova, Şirvanşahlar Saray Kompleksi” Dövlət Tarix-Memarlıq Qoruq Muzeyinin direktor müavini Təranə Balayeva və digər iştirakçılar Şəhidlər Xiyabanını ziyarət edərək vətən uğrunda canlarından keçən şəhidlərin xatirələrini yad ediblər.

Sonra İsmayıllı rayon Mədəniyyət Sarayında xalqımızın yaddaşına şərəfli və qanlı hərflərlə yazılmış qanlı yanvar hadisələri ilə bağlı fotosərgi nümayiş etdirilib.Sərgiyə qatılanlar qanlı yanvar hadisələrinin canlı şahidi kimi, öz xatirələrindən əsaslı nümunələr gətirərək tədbir iştirakçılarına tarixi hadisələrin dəhşətini anladıb. Qədim dövlətçilik ənənəsinə malik Azərbaycan xalqının öz müstəqilliyi və dövlət müqəddəratı uğrunda tarix boyu çox bədəllər ödədiyini və 20 Yanvar hadisələrinin də bu bədəllərdən biri olduğu diqqətə çatdırılıb.

Tədbir 20 yanvar dəhşətlərini və faciəyə qarşı çıxan xalqımızın dəyanətini, vətənpərvərliyini özündə əks etdirən bədii kompozisiyanın və filmlərin nümayişi ilə başa çatıb.

Qeyd edək ki, tədbirdə «Sosial Hüquqların Araşdırılması» İctimai Birliyinin sədri, professor Mais Əliyev, Beynəlxalq İnsan Hüquqları Komitəsinin (CIPDH) inspektoru, ekspert Firdovsi Ələkbərov (Fransa), Beynəlxalq İnsan Hüquqları Komitəsinin (CIPDH) eksperti, sülh səfiri Aleksandr Şapiro-Suliman, "20 Yanvar” Cəmiyyətinin İdarə Heyətinin üzvü Müseyib Yusifov da iştirak edib.