Bir kişi güclü və varlı bir dövlətin vətəndaşı olsa belə, evinə çörək pulu apara bilməməyin dərdindən və utancından özünü asır...

Respublikamızın hər bir şəhərində, hər qəsəbəsində, az qala, hər küçəsində işğal altında olan torpaqlarımızın adını daşıyan obyektlər var. Özü də təəssüflər olsun ki, həmin obyektlərin heç biri nə kitab satışı yeri, nə uşaq bağçası, ya da ən azından aptek deyil. Hamısı restoran, kafe, hətta bar adlarıdır. Nə yazıq ki, işğal altında olan səfalı məkanların adlarını daşıyan yerlər həmişə araq, kabab, tütün qoxusu verir... Budurmu bizim təfəkkürümüz?!
Bir-birinin bəhsinə biznesmen-məmurlar "həm ziyarət, həm ticarət" prinsipi ilə Məkkəyə gedib, beşulduzlu otellərdə dincəlib Vətənə Hacı kimi dönürlər, ehtiyacı olan birinə qıymadıqları "yüzlük"lə tərlərini silib, namaza dururlar...
Məktəb partasından qalxıb azad cəmiyyətdə azad, müstəqil həyata atılan gənc bir çox hallarda gözlədiyinin tam əksi olan həyatın şahidi olur: dərs kitablarında oxuduğu, müəllimlərinin yorulmadan tərif etdiyi varlı, ədalətli cəmiyyət yerinə doğruluq prinsipinin, halal əxlaq və halal zəhmət kodekslərinin pozulduğu bir cəmiyyətlə rastlaşır...
Hər gün efirdən eşitdiyimiz "Ermənistanın Azərbaycana qarşı hərbi təcavüzü davam edir" sözləri getdikcə öz aktuallığını itirir və adiləşir...
Orta və yaxud ali məktəbi zor-bəla bitirən, avara-avara gəzməkdən yorulan gənc oğlan əldə olan pulunu toplayır, əyər-əskiyini də qohum-əqrəbadan düzəldib bir marşrut avtobusu (və ya yük maşını) alır. Həmin gün də vaxt itirmədən musiqi mərkəzi quraşdırıb, iri bir gözmuncuğu, bir topa da üzərlik tapıb ən gözəgəlimli yerdən asır və... başlayır "terrora"....
Valideyn öz övladını vətəndaşı olduğu ölkədə icbari təhsil almalı olduğu məktəbə pulla qoyur. Çünki direktor and-aman eliyir ki, "məktəbdə yer yoxdur”. Bağçalarda da eyni vəziyyət – “uşaq sayına bağça çatışmır”, – deyirlər…
Ali məktəbi yeni bitirən kadrların iş məsələsi də qalır “dayı”nın, “day-day”ın öhdəsində.
Nə olsun ki?! Dedim axı, bu, nağıldır. Keçək reallığa.
Başımız dik, alnımız açıq, üzümüz ağ! Vətənimiz daima inkişafda, kasıblıq, rüşvət minimum həddə, təhsil, səhiyyə qüsursuz!

 Daim irəli!

 Yox, DAYIm irəli!


 Gülnarə