"Sumqayıt” Ticarət Mərkəzində çalışan yüzlərlə icarədar adıçəkilən mərkəzin sahibi, sabiq millət vəkili Nizami İsgəndərovdan cavab gözləyir.

Bu barədə Moderator.az-ı özəl mənbə məlumatlandırıb. Mənbənin sözlərinə görə, təxminən iki gün bundan öncə icarə qiymətlərinin azaldılması tələbi ilə çıxış edən xeyli sayda icarədar, N.İsgəndərovun müavini ilə görüşüb. Onlar ölkədəki mövcud böhranı və bu böhranın əhalinin alıcılıq qabiliyyətini daha da aşağı saldığını, satış tempinin kəskin şəkildə azaldığını əsas gətirərək, icarə qiymətlərinin keçici bir dönəm üçün də olsa azaldılmasını xahiş edib.

Mənbənin sözlərinə görə, icarədarların arzu və istəklərini ilə tanış olan rəhbərlik məlum durumla bağlı N.İsgəndərovun məlumatlandırılacağının, icarə qiymətlərinin azalıb-azalmayacağına yalnız sabiq millət vəkilinin qərar verəcəyini bildirib.

Mənbə hesab edir ki, əgər icarə qiymətlərinin azaldılması ilə bağlı gözləntilər reallıqda öz əksini tapmasa, bu, çoxlu sayda xırda sahibkarın ticarət mərkəzini tərk etməsinə səbəb olacaq.