Son günlərin maraqlı hadisələrindən biri də gənc publisist-şairə Aysel Əlizadənin aldığı qeyri-adi evlilik təklifi idi. Ölkədə tanınan gənclərdən olan Ramin Hacılı Bakıda keçirilən tədbirlərdən birində gözlənilmədən Aysel Əlizadəyə evlilik təklif etmişdi. Ardınca mətbuata açıqlama verən şairə isə bu təklifə “hə” cavabı verməsi üçün bir sıra şərtlərinin olduğunu açıqlamışdı. “Qafqazinfo” xəbər verir ki, Ailem.az bu maraqlı hadisənin tərəflərindən olan Ramin Hacılı ilə söhbət edərək, Aysel xanımın şərtlərinin nədən ibarət olduğunu öyrənməyə çalışıb. 

- Ramin bəy, həmin tədbirdə Aysel xanıma evlənmə təklifi etməyi əvvəlcədən planlaşdırmışdınız, yoxsa sponton idi? Evlilik təklifi üçün niyə məhz o tədbiri seçdiniz?

- Bəli, TEDxBakı-da çıxış edəcəyimi biləndən sonra planlaşdırdım. Sürpriz idi deyə yalnız mənə yardımçı olan dizayner dostum və təşkilatçılardan biri bilirdi. Onları da  sürpriz olduğu barədə xəbərdar etdim və biz bunu başqa heç kimlə bölüşmədik.

Əslində bu təklifin TEDxBakı səhnəsindən edilməsi TED fəlsəfəsinə uyğun idi. Çünki TEDx spikeri öz həyatında önə çıxan nüansları bölüşür və bunu təqdim etdiyi özünəxas ideyaya bağlayır.

Mənim ideyam xoşbəxtlik hormonlarını artırmaq üçün fərdin uğurunu istinad seçməyinin vacibliyi ilə bağlı idi. Öz həyatımdan danışdım və bu əsnada araşdırmamı təqdim etdim.

Aysel xanıma evlilik təklifi etməzdən öncə də onunla bağlı kiçik bir hekayəmi danışdım. Məhz bu hekayə ona TEDx səhnəsindən evlilik təklifimə zəmin yaratdı.

- Tədbirdə Aysel xanımından cavab gözləmədən səhnədən endiniz. Bəs, Aysel xanımın cavabı nə oldu?

- Şərtlərini yazdı mənə (gülür).

- Mümkünsə həmin şərtləri ictimaiyyətlə də bölüşə bilərsinizmi?

- Olduğu kimi deyirəm:

“Ramin, indiki obrazını sonadək qorumağını istəyirəm.

1.   İkili həyat yaşamayacaqsan. Həyatın boyu dürüst və ədalətli olacaqsan.

2.   Zəhmətdən qorxmayacaqsan, heç vaxt çirkli pullara bulaşmayacaqsan.

3.   Nə uğurun olsa da, insanları sevəcəksən, onlara yuxarıdan aşağı baxmayacaqsan.

4.   Heç bir halda evə içkili, yıxıla-yıxıla gəlməyəcək, evdə aqressiv ortam yaratmayacaqsan. Sən gələndə bayram olacaq.

5.   “Qadınlar gülləri sevər” deyimini unutmayacaqsan.

6.   Məişət qayğılarını boynundan atmayacaqsan. Məsələn, gündə ən azı bir dəfə çayı özün dəmləyəcəksən, köməkçi yoxdursa, evi yığışdırmağa kömək edəcəksən.

7.   Heç bir xanıma, heç kimin qızına, qadınına artıq-əskik təkliflər etməyəcəksən.

8.   Xanımınla karyera rəqabətinə girib onu əzməyə çalışmayacaqsan.

9.   Rəfiqəmin həyat və yaradıcılığı diqqətdən kənarda qalmayacaq.

10. Mən sənin ananı sevəcəyim kimi sən də ailəmi - anamı və qızımı özündən ayırmayacaqsan.

Bir sözlə, heç vaxt dəyişmə, Ramin Hacılı!”.

Bu şərtlərin hamısın qəbul etdim.

Mənim arzum odur ki, hər bir Azərbaycan kişisi qadın deyiləndə ilk olaraq anasını xatırlasın. O halda zorakılıq azalar, bərabər hüquqluluq artar. Bu qədər boşanma halları olmaz, ailə münaqişələri yaşanmaz. Beləcə, övladlarımız xoşbəxt böyüyər, qorxaq olmaz, azad olar və ən əsası gözəl gələcəklərini qurma potensialları formalaşar. Bu baxımdan, övladlarımızın xoşbəxtliyi naminə gərək xanımlarımızı xatun edə bilək, şərtləşməyi bacaraq.

Diqqət etmisinizsə, güclü kişilər xanımlarını əzmir, xoş münasibət göstərir. Əzilən kişilər hər zaman qadınlarından qisas alır.

- Azərbaycan cəmiyyəti üçün çətin qəbul olunan tendesiya olduğundan soruşmaq istərdim, ailəniz bu qərarınızı necə qarşılayıb?

- Mənim ailəm də, qohumlarım da, dostlarım da, bir sözlə, ətrafımda olan hər kəs Ramin Hacılı məsuliyyətini dərk edir. Bu səbəbdən ailəm normal qarşıladı. Mənə ağıl vermək və ya öyüd-nəsihət atəşinə tutmaq heç kimin ağlından belə keçmir.

Məsələnin cəmiyyət tərəfinə gəlincə, hər bir ana övladının xoşbəxtliyini istəyir. Qızı xoşbəxt olmayan, evdə qalmağa məcbur edən analar bununla övladlarının yalnız bir seçim şansının olması fikrindən daşınmalıdırlar. Bu dinimizdə də, dəyərlərimizdə də, qanunlarımızda da belə təsbit olunub: “insan xoşbəxtliyi üçün azad seçimə malik olmalıdır”.

Bütün mübarizələr, savaşlar, dəyərlər insan xoşbəxtliyi üçün olur.

Hər bir ananın, atanın, qardaşın, bacının, babanın övladı xoşbəxt olmadığı evdən geri qayıda bilər. Heç kəs bu cür hallardan sığortalanmayıb. Bu halda qadınlarımız növbəti həyatını çox rahat qura bilməlidir. Onlardan bu şansı almaq vicdansızlıqdır.

Məsələnin əsas üzü sevgidir. Xoşbəxtliyin təminatçısı sevgidir. Əgər iki insan bağlı qapı arxasında xoşbəxt ola bilirsə, buna sarılmalıdır.

- Şərtləri qəbul etdiniz, ailəniz razı, toyu nə zamana planlaşdırırsınız?

-Bəli, şərtləri qəbul etdim, ailələr razı, dostlar həsrətlə gözləyir. Toyun sentyabr ayında olmasını təklif etmişəm. Əminəm ki, ümumi razılıqla bu payız dostlarımızla sevincimizi bölüşəcəyimiz məclis quracağıq.