Öz yolunu seçən və bu yolla irəliləyən insanlar. Öz yolunu seçən insanlarüçün nə başlanğıc var, nə də son!
Neçə müddətdir bu məqaləni yazmaq istəyirdim. Çünki bəhs edəcəyim Yeddi polis işçisinin acı hekayəti hər bir Zəngilanlının xatirindədir. Onlar eyni mənəvi məkanı bölüşən qəhrəman oldular:
Sabir Paşayev, Elşad Nərimanov, Fazil Bəşirov, Möhlət İsmayılov, İlham Quliyev, İsmayıl İsmayılov və Aqil Quliyev!
Məlumdur ki, mifologiyada 7 müqəddəs rəqəm hesab edilir. Nağıllarda da 7 qəhrəman olardı. Məqaləmdə bəhs edilən polis işçiləri də 7 qəhrəman oldular.
Gedişlərilə acı hekayət buraxan, gözləri yaşlı, qəlbləri nigaran qoyan qəhrəman! Bir qədər qayıdaq tarixə. Tarix təkcə, müəllim olmaqdan qalmır, həm də ondan dərs götürməyənlərə bu dərsi təkrarlaşım olur.
1993-cü ildə Zəngilan rayonunda ağır döyüşlər gedirdi. İndi bizdən çox-çox uzaqda Zəngilan torpağında yeddi oğul var idi. Onlar Zəngilan rayon Pilis İdarəsinin əməkdaşları idilər. Bəlkə də onların ən böyüyünün 26-27 yaşı olardı. O vaxtlar uşaq idim. Bu yaş bizim üçün nece böyük bir yaş imiş. İndi isə baxanda görürsən ki, onların hərəsi bir ananın lap gənc övladı imiş. Lakin onlarda olan mətinlik, qorxmazlıq yaşlarından asılı olmayaraq bir həqiqət duyğusu idi. Mən bu reallıq hissini alqışlayıram.
Yeddi igid ölümdən qorxmadan Zəngilanın müdafiəsində fəal şəkildə döyüşürdü. Onlar qəhrəman döyüş yolu keçmiş, müharibə acısını dadmış,arxasında vətən, ailə dərdi buraxmış şəxslər idi. O igidlərə ölüm yox, yaşama üçün həyat yaraşırdı.
Onların həyatını “Nəslin yarpaq tökümünün xatirsəi” və ya “yaddaşlara köçənlərin nisgili” ilə əlaqələndirmək olar.
Qeyd edim ki, yedii polis əməkdaşı haqqında Zəngilana aid yazılmış bir çox mənbələrdə bəhs edilmişdir. Salam Cavadlının “Son gümanım-Zəngilanım” kitabında ən təsirli motiv “Yeddi oğul hekayəti”dir. Həmin kitaba yazdığım məqalədə fikirlərimi belə cəmləşdirmişdim: “1993-cü ilin ağrılı oktyabr günlərində yeddi qəhrəman oğul itkin düşdü. Onların içində Sabir Paşayev də var idi. Sabir Paşayevi uşaqlıqdan tanıyırdım.Anamın şagirdi olmuşdur. Zəhməti və bacarığı ilə seçilən Sabir mühüm tapşırıqlarla polis zabiti kimi ən çətin sahələrə göndərilirdi.
Müəllif onun fədakarlığa və təşəbüskarlığa malik olan keyfiyyətini –öz vətəninə sadiqliyin, sıx tellərlə bağlılığın göstəricisi kimi təqdim edir. Kitabın bu hissəsi “həsrət, hicran yağışının töküldüyü yer” dir. Bu yağış göz yaşıdır, illərdir övladlarının həsrətilə yaşayan anaların, bacıların-zəngilanlıların həsrət yağışıdır”.
Sabir Paşayevin qızı Aysel heç atasının üzünü görə bilmədi. Bu yaxınlarda eşitdim ki, onun qızı artıq ali məktəb tələbəsidir. Atasının yaşamasına, qayıtmasına çox böyük ümid edir. Sanki şeirin misrlarındakı kimi:
Heç nə dəyişmir, ata,
Xoşbəxt olmur bir nəfər.
Hamı dərdli, hüznlü,
Hamı sənsiz beş-betər.
Həmçinin, sosial şəbəkələrdə Fariz Möhlətoğlunun yaxın günlərdə atasının şəklinin altında “Möhlət İsmayılov mənim atamdır” deməsi çox kövrəldir məni. Bəli, gerçəklər min dəfə ağrı və acı verir. Mənim gücüm ancaq xatırlamağa çatır.
Xatirələrin üstündə xatırlamaq üçün keçmiş qədər hakim ola biləcək ikinci bir qüvvə yoxdur .
Bundan başqa, Əli Məmmədyarovun “Zəncirlənmiş pələnglər” kitabında da bu əfsanəvi qəhrəmanlar xatırlanır, geniş məlumatlar verilir. Zəngilan Rayon Polis İdarəsində işləyən çavuş Bəşirov Fazil , Quliyev Aqil Mehrəli oğlu (çavuş), Quliyev llham İmamqulu oğlu (çavuş), İsmayılov İsmayıl Barat oğlu (çavuş), İsmayılov Möhlət Bəhmən oğlu (çavuş), Nərimanov Elşad Əvəz oğlu (bölmə komandiri, baş çavuş), Paşayev Sabir Əziz oğlu (sahə müvəkkili, leytenant) ilə Cəbrayıl rayonunun Dərzili kəndi (Zəngilan rayonu ilə həmsərhəd olub) uğrunda döyüşdə itkin düşdülər.
Dünən -2 iyul Polis günü idi. Mən bu məqaləmlə onların xatirəsini anmaq istədim. Onlara Polis gününüz mübarək- demək istədim. Zəngilanlılar heç bir zaman Sizləri unutmadı- deyə səslənmək istədim.
Bu yazı mənim şəxsi istəyimdən hasilə gəldi. Seymur Baycan “Quark” romanında qeyd edir:” Hər ömrün öz adı var. Əgər kimsə nə vaxtsa mənim haqqımda yazsa, o yazının adını “yollarda keçən ömür” qoymalıdır.
Mən də 21 illlik müddəti uzun bir yol adlandırıram. Bu yolda bütün Zəngilanlılar öz yeddi polis əməkdaşının acı hekayətini unutmadılar, səbirsizliklə
onları gözlədilər. Gah onların qəhrəman kimi ölmünü qəbul etdilər, gah da əsirlikdə yaşama ümidi ilə gözlərini yollara dikdilər. Ümid edirəm ki, Tanrı onların ailəsini bir gün bu minvalla sevindirər!
Nəsillərin əlaqəsi kəsiləndə tarixin yükü ağırlaşır. Yaddaşlsızlıq və unutqanlıq xətası baş verməsin deyə biz də sizləri unutmadıq. Ötən onilliklərin sırasında əldə etdiyiniz əbədiyyətlik və qəhrəmanlıq sizi bu zirvəyə ucaltdı.
TƏRANƏ ŞÜKÜRLÜ
AMEA-nın aparıcı elmi işçisi, dosent.
Xəbərdən istifadə edərkən istinad etmək vacibdir.
