Sumqayıtda tədrisin rus və Azərbaycan dillərində olduğu orta ümumtəhsil məktəblərinin şagirdləri arasında rus dili və ədəbiyyatı fənni üzrə VIII Respublika Olimpiadası keçirilib. Olimpiada Rusiya Federasiyasının Azərbaycandakı səfirliyi, "Rossotrudniçestvo” agentliyinin ölkəmizdəki nümayəndəliyi, Təhsil Nazirliyi və Azərbaycanın Rusdilli Tədris Müəssisələrinin Müəllimləri Assosiasiyasının birgə təşkilatçılığı ilə reallaşıb. Ümumiyyətlə, bilik yarışı 2 mərhələdə - regionlarda və Bakıda təşkil olunacaq.

AZƏRTAC xəbər verir ki, birinci mərhələ Sumqayıtda fevralın 19-da start götürüb. Olimpiadada Sumqayıt şəhəri və Abşeron rayonunda Azərbaycan və rus dilinin tədris olunduğu məktəblərin VII-VIII siniflərindən 132 şagird iştirak edib.

Olimpiadanın açılış mərasimində Sumqayıt şəhər 11 nömrəli tam orta məktəbin direktoru Şəhla Bağırova çıxış edərək bildirib ki, respublikamızda 80 min insan rus dilində təhsil alır. Sumqayıtdakı 11 nömrəli məktəb də rus dilini intensiv şəkildə öyrədən təhsil ocaqlarından biridir. Direktor diqqətə çatdırıb ki, bugünkü olimpiadada rus dili vasitəsi ilə multikulturalizm dünyasına və sehrli poeziya aləminə səyahət ediləcək. Olimpiadanın keçirilməsində əsas məqsəd rus dilini və rus mədəniyyətini dəstəkləməkdir.

Rusiya səfiri Vladimir Doroxin çıxış edərək deyib ki, Azərbaycanda rus dilinə böyük maraq var: "Bu, bizi çox sevindirir. Azərbaycan yeganə ölkədir ki, burada rus dilinin inkişafı üçün geniş imkanlar yaradılıb”.

Səfir, həmçinin belə tədbirlərin Rusiya və Azərbaycan dövlətlərinin qarşılıqlı əlaqələrinin inkişafında böyük əhəmiyyət kəsb etdiyini də diqqətə çatdırıb. V.Doroxin rus dilinin yüksək səviyyədə tədrisinə görə təhsil müəssisəsinin pedaqoji kollektivinə təşəkkürünü bildirib və şagirdlərə uğurlar arzulayıb.

Sonra Sumqayıt şəhər Təhsil Şöbəsinin müdiri Teymur Səmədov olimpiadanın keçirilməsinin əhəmiyyətindən danışıb.

Tədbirin sonunda Sumqayıt şəhər 11 nömrəli tam orta məktəbin şagirdləri rus dilində şeirlər və mahnılar səsləndiriblər.