"İndiyə kimi Milli Məclisdə seçicilərlə 20-dən çox görüşümüz olub."
Milli Məclisə seçkilərin keçirilməsindən 3 aydan çox vaxt keçib.  
Bu müddət ərzində Sumqayıtdan seçilmiş deputatlar seçiciləri ilə görüşüblərmi?
Elə bu məqsədlə 42 saylı Sumqayıt ikinci seçki dairəsindən Milli Məclisin deputatı seçilmiş Tahir Mirkişiliyə müraciət etdik. Qeyd edək ki, T. Mirkişili parlamentin İqtisadi siyasət, sənaye və sahibkarlıq komitəsinin üzvüdür. İlk dəfə millət vəkili seçilmiş T. Mirkişili Xeberle.com-a bildirdi ki, ötən müddət ərzində seçicilərlə çoxsaylı görüşlər keçirib:
"İndiyə kimi Milli Məclisdə seçicilərlə 20-dən çox görüşümüz olub. Qəbullar əsasən parlamentdə olur.”
T. Mirkişilinin sözlərinə görə seçicilər bir sıra problemlərin həll olunması istiqamətində köməyə ehtiyac duyurlar: "Kömək göstərməyə çalışdığımız sahələr əsasən hüquqi məsləhətlər, işsizlik, təhsil və digər məsələlərlə bağlıdır.” 
Deputat seçildiyi Sumqayıt şəhərində vətəndaşların qəbulu üçün ofisin olmadığını və yaxın zamanlarda bu məsələnin öz həllini tapacağını deyib.
Millət vəkili həmçinin qeyd edib ki, seçicilərin maraqlandıran sualları sosial şəbəkələr vasitəsilə də cavablandırır.
O, vurğulayıb ki, bununla yanaşı Milli Məclisin deputatı Muxtar Babayevlə birgə Sumqayıtda müxtəlif sahələrdə çalışan insanlarla da görüşlər keçiriblər: "Son bir ayda şəhərdə 9 belə görüş keçirmişik.”
Xeberle.com