Beynəlxalq Diaspora Mərkəzi "Xocalıya Ədalət” beynəlxalq kampaniyası çərçivəsində Xocalı faciəsinin 24-cü ildönümü ilə bağlı anım tədbiri keçirib. Tədbirdə bildirilib ki, erməni silahlı birləşmələri SSRİ dövründən Xankəndi şəhərində dislokasiya olunmuş 366-cı motoatıcı alayının zirehli texnikası və hərbi heyətinin köməkliyi ilə 1992-ci il fevralın 25-də Xocalı şəhərinə hücuma keçib. Əsrin faciəsi olan Xocalı soyqırımı nəticəsində 63-ü uşaq, 106-sı qadın, 70-i qoca və qarı olmaqla, 613 Xocalı sakini qətlə yetirilib, 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. Düşmən gülləsindən 76-sı uşaq olmaqla, 487 nəfər yaralanıb. 1275 nəfər əsir götürülüb. Girov götürülənlərdən 150 nəfərinin, o cümlədən 68 qadın və 26 uşağın taleyi bu günədək məlum deyil. Beynəlxalq İnsan Hüquqları Müdafiə Mərkəzinin (CİPDH) eksperti, sülhməramli səfir Aleksandr Şapiro-Suliman Xocalı soyqırımı barədə həqiqətlərin dünyaya çatdırılmasına çalışdığını qeyd edib. Sülhməramlı səfir Xocalı soyqırımının ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktı olduğunu vurğulayıb. O, həmçinin bildirib ki, bu soyqırım bütün bəşəriyyətə qarşı tarixi bir cinayətdir. A. Şapiro-Suliman beynəlxalq təşkilatları da ittiham edib, dünya ictimaiyyətini Xocalıda törədilən vəhşiliklərə göz yumammağa və düzgün qiymət verməyə çağırıb: "Beynəlxalq təşkilatlar Azərbaycan xalqının başına gətirilən dəhşətli faciələri görmür. Sanki, gözləri kor, qulaqları isə kardır. Ermənilər insanlığa qarşı etdikləri vəhşiliklərə görə cavab verməlidirlər. Necə ki, almanlar yəhudilərə qarşı törədilənlərə görə təzminat ödədilər, ermənilər də Xocalı soyqırımına görə təzminat verməlidirlər.” Tədbirdə Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildən başlanılan "Xocalıya ədalət” beynəlxalq kampaniyasının əhəmiyyəti də vurğulanıb. Diqqətə çatdırılıb ki, kampaniya çərçivəsində Xocalı soyqırımı ilə bağlı beynəlxalq səviyyədə məqsədyönlü təbliğat tədbirləri həyata keçirilir, Azərbaycanın haqq səsi dünyaya çatdırılır. "Xocalıya ədalət” beynəlxalq kampaniyasının əsas məqsədi Xocalı soyqırımına beynəlxalq səviyyədə adekvat siyasi-hüquqi qiymətin verilməsi, ədalətin təmin olunması və soyqırımı qurbanlarının xatirəsinin əbədiləşdirilməsindən ibarətdir. Qeyd olunub ki, bu günədək Xocalı soyqırımı ilə bağlı 11 dövlət sənəd qəbul edib, ABŞ-ın 21 ştatı isə soyqırımı tanıyıb.