Sumqayıtda "N” saylı hərbi hissədə "Əlil Sahibkarlar Təşkilatı” ictimai birliyinin (ƏSTİB), "Vətəndaşların Sosial Rifahının Gücləndirilməsinə Dəstək" İctimai Birliyinin (VSRGD İB) təşkilatçılığı ilə Xocalı soyqırımının 24 –cü ildönümü ilə bağlı tədbir keçirilib.

ƏSTİB-in Mətbuat xidmətindən verilən məlumata görə, tədbirdə bir sıra qeyri-hökumət təşkilatlarını rəhbərləri, Qarabağ müharibəsi iştirakçıları, ictimaiyyət nümayəndələri, idmançılar, hərbi hissənin rəhbərliyi və əsgərlər iştirak ediblər.

Əsgərlər qarşısında çıxış edən ƏSTİB-in sədri Mirzə Məmmədvəliyev Xocalıda xalqımızın başına gətirilən müsibətdən, Ermənistanın Azərbaycan xalqına qarşı apardığı məqsədyönlü soyqırımı siyasətindən danışıb. Qeyd edib ki, erməni təcavüzkarlarının Azərbaycan xalqına qarşı törətdiyi növbəti kütləvi qırğın nəticəsində 613 nəfər, o cümlədən 106 qadın, 63 uşaq, 70 qoca amansızlıqla qətlə yetirilmiş, 487 nəfər şikəst olmuş, 1275 dinc sakin əsir götürülmüş, 155 nəfərin taleyi isə hələ də məlum deyildir. Bu soyqırımı aktı nəticəsində 8 ailə tamamilə məhv edilmiş, 25 uşaq hər iki valideynini itirmişdir. Xocalı faciəsi 200 ilə yaxın bir müddətdə erməni millətçilərinin və onların havadarlarının Azərbaycan xalqına qarşı apardığı etnik təmizləmə və soyqırımı siyasətinin davamıdır.

M. Məmmədvəliyev vurğulayıb ki, Azərbaycan dövləti erməni millətçilərinin xalqımıza qarşı törətdiyi cinayətlər, o cümlədən Xocalı soyqırımı haqqında həqiqətlərin dünya ictimaiyyətinə çatdırılması, onun soyqırım kimi tanıdılması üçün məqsədyönlü və ardıcıl fəaliyyət göstərir.

Digər çıxış edənlər - Qarabağ müharibəsində döyüşən azərbaycanlı ilk qadın snayper Növrəstə Yusifova, "Erməni Təcavüzünün Tanıdılması” İctimai Birliyinin sədri Səriyyə Cəfərova, II qrup Qarabağ əlili Məmməd Həsənov, "Məşəl” İctimai Birliyinin sədri Alman Abbasov, "Addım” Gənclər İnkişaf Mərkəzinin sədri Kamil Həmidov qeyd ediblər ki, bu qanlı gecədə erməni təcavüzkarlarının törətdikləri vəhşilik yaddaşlardan heç zaman silinməyəcəkdir. Çünki həmin gecə baş verənlər təkcə Azərbaycan xalqına qarşı soyqırımı deyildi, bəşəriyyətə, insanlığa qarşı törədilmiş qanlı cinayətdir.

Çıxışlardan sonra "Araz" idman klubunun rəhbəri, Karate üzrə 5 qat Dünya, 6 qat Avropa çempionu Siyavuş Bayramovun tələbələri əsgərlər qarşısında müxtəlif idman hərəkətləri göstəriblər.

Sonra "Vətəndaşların Sosial Rifahının Gücləndirilməsinə Dəstək” İctimai Birliyinin "Milli, mənəvi və əxlaqi dəyərlərin gənclər arasında təbliği və təşviqi” adlı layihə çərçivəsində hazırladığı Azərbaycanın Milli Qəhrəmanları Rafiq Alıcanov, Mərifət Nəsibov və Şamoy Çobanovun qəhrəmanlıq yolundan bəhs edən "Ölümə qənşər” adlı bədii-sənədli filmi və Dağlıq Qarabağ müharibəsi zamanı ermənilərə əsir düşən və qaçmağa qərar verən azərbaycanlılardan bəhs edən "Əsirlikdə 606 gün və Cəhənnəmdən qaçış”adlı sənədli film nümayiş olunub.

Sonda Hərbi hissə komandanlığı adından "Əlil SahibkarlarTəşkilatı” ictimai birliyinin sədri Mirzə Məmmədvəliyevə, Qarabağ müharibəsində döyüşən azərbaycanlı ilk qadın snayper Növrəstə Yusifovaya, "Erməni Təcavüzünün Tanıdılması” İctimai Birliyinin sədri Səriyyə Cəfərovaya, II qrup Qarabağ əlili Məmməd Həsənova, "Məşəl” İctimai Birliyinin sədri Alman Abbasova, "Addım” Gənclər İnkişaf Mərkəzinin sədri Kamil Həmidova, Güllə atıcılığı üzrə paralimpiya yığma komandasının baş məşqçisi Əfqan Əhmədova Fəxri fərmanlar təqdim olunub.