Sumqayıtda Azərbaycan Respublikasının Prezidenti yanında Gənclər Fondunun maliyyə, Gənclər və İdman Baş İdarəsinin təşkilati dəstəyi ilə“Ürəyimizdəki Vətən Sevgisi” adlı layihənin icrası davam edir. Layihə çərçivəsində 6 iyul 2014-cü il tarixində 30 nəfər yeniyetmə və gəncin iştirakı ilə ilk disput keçirilib.

Disput gənclərin ayaq üstə Azərbaycan Respublikası Dövlət Himni fonunda dövlətçilik atributlarımızı təbliğ edən qısametrajlı videoçarxa baxış ilə başlayıb.

Daha sonra layihə rəhbəri Pərviz Əlimuradov iştirakçıları və qonaqları salamlıyaraq layihənin məqsəd, vəzifələri və gözlənilən nəticələr barədə geniş məlumat vermişdir. P. Əlimuradov çıxışında Dövlət Başçısının təşəbbüsü ilə respublikanın şəhər və rayonlarında bayraq meydanlarının yaradılmasının dövlət rəmzlərinin təbliğində təqdirəlayiq hal kimi vurğulamış və hər bir vətəndaşımızın dövlət rəmzlərimizi tanıması və onu qorumasının ümdə vətəndaşlıq vəzifələrindən olduğunu qeyd etmişdir.

Disputda çıxış edən qonaqlar N saylı hərbi hissənin müddətdən artıq həqiqi hərbi xidmət hərbi qulluqçuları Ə. Hüseynov, R. Həsənov, şəhər Gənclər və İdman Baş İdarəsinin Gənlərlə iş sektorunun əməkdaşı C. Hüseynov, “Gənclərin Töhfəsi” İctimai Birliyinin sədri A. Vəliyev, məşqçi - müəllim İ. Niftəliyev və R. Əlimuradov Ümummilli Liderimiz Heydər Əliyevin dövlət rəmzlərinin təbliği istiqamətində əsasını qoyduğu dövlət siyasətinin cənab Prezident İlham Əliyev tərəfindən uğurla davam etdirildiyini, gənclərdə vətənpərvərlik və dövlətçilik hisslərinin gücləndirilməsi istiqamətində, onların hərbi-vətənpərvərlik sahəsindəki tərbiyəsində uğurlu və əməli işlərin görüldüyünü qeyd ediblər.

Disputda müxtəlif sahələri təmsil edən ictimai - fəal yeniyetmə və gənclərin iştirak etməsi sözügüdən mövzu ətrafında fikir mübadiləsini daha da genişləndirmiş və iştirakçıların dövlət rəmzlərimizin təbliği istiqamətində fikirləri dinlənilib.

Sonda disput iştirakçılarına masaüstü dövlət bayraqları, dövlət rəmzlərimiz haqqında məlumatları özündə əks etdirən braşür və bukletlər təqdim edilib.