Bakı-Sumqayıt marşrutlarındakı gərgin, problemli vəziyyətlə bağlı şikayətlər dayanmır. Bu barədə dəfələrlə bizlərə müraciətlər daxil olur. Elə bu səbəbdən əməkdaşlarımız Bakı-Sumqayıt yolu marşrutlarındakı vəziyyəti öyrənməyə çalışdı.

Əvvəlcə yolumuzu Bakı Beynəlxalq Avtovağzalından saldıq. Bizə daxil olan müraciətdə əsasən insanların avtovağzalda saatlarla marşrut gözləməsindən şikayət olunurdu. Vətəndaşların bildirildiyinə görə, marşrutlar vaxtlı-vaxtında gəlmir. Bu isə sərnişinlərin ciddi narazılığına səbəb olur. Müşahidələrimiz zamanı gördük ki, insanlar toplu şəkildə marşrut gözləyir. Nəqliyyat vasitələri isə dayanacağa gec-gec gəlir.

Avtovağzala toplaşan insanlarla söhbətimiz oldu. Məsələn, Məmməd dayının danışdıqları real vəziyyəti açıq-aşkar göstərirdi. Həqiqətən, buradakı vəziyyət heç də ürəkaçan deyildi. Avtobusa çoxlu sərnişin mindirildiyi zaman orada yaşanan sıxlıq xüsusən isti aylarda böyük havasızlığa səbəb olur. Bu da ürəyi zəif olanlar üçün əlverişli deyil. Sumqayıtdan qayıdan nəqliyyat vasitələrində də həmin vəziyyət müşahidə olunur.

Bakıya gedən avtobusların bir qismi Saray qəsəbəsindən keçir. Bu zaman Bakı-Sumqayıt marşrutları əksər hallarda dolu vəziyyətdə qayıdırlar. Saray camaatının Bakıya getməsi xeyli çətinləşir. Bu da çox vaxt onların saatlarla yollarda qalması, nəqliyyat vasitəsini gözləməsi ilə nəticələnir.

Yolumuza Saray kəndi ilə davam etdik. Hamı ilə birlikdə avtobus gözlədik. Sakinlər dayanacaqda deyinirdi. Giley-güzar ortanı götürmüşdü. Onların sözlərinə görə, burada hər gün belə bir vəziyyətdir. Gülzar adlı bir xanım emosional şəkildə bizə bunları dedi: “İnsanların artıq səbir kasası daşır. Nə qədər işə gecikmək olar”.

Nəhayət, avtobus gəldi. Bu dəfə həmsöhbətimiz sürücü oldu. Ondan niyə gecikdiyini soruşduq. İzahat belə oldu: “Günün bu saatlarında yollarda bilirsən nə qədər adam olur?! Hələ mən, Saray körpüsündəki “probka”nı demirəm. Yarım saatdır çıxa bilmirəm oradan. Bilirəm ey, camaat burada gözləyir. Amma nə edim...”.

Avtobusda kimə baxırdınsa, üzündən “əsəb yağırdı".

Onu da deyək ki, Bakı-Sumqayıt marşrutları ilə bərabər, taksilər və şəhərlər arasında istifadəsinə qadağa qoyulan nisbətən kiçik tutumlu "Ford"lar vasitəsilə də insanların daşınması reallaşdırılır. Taksilərin qiyməti baha olur deyə çoxları ümumi nəqliyyat vasitələrindən istifadə edir. Çox zaman sərnişinin birini 2 manatdan daşıyırlar. Nadir halda belə taksilərdən "1 manatlığını" tapmaq olur, onu da ki, gərək çox gözləyəsən.
"Ford"ların isə kiçikhəcmli, oturacaqların sıx-sıx olması, havalandırma sisteminin düzgün qurulmaması insanlarda narahatlıq yaradır. Bunlara baxmayaraq, qiymətlər yüksək, keyfiyyət isə aşağıdır. Elə buna görə də sərnişinlərlə sürücülər arasında çox vaxt problemlər yaşanır. Bütün sadalanan bu problemlərin nə zaman aradan qaldırılması sualına cavab tapmaq üçün aidiyyəti qurumlara üz tutduq.

Nəqliyyat Nazirliyi “Azəryolservis” ASC-in mətbuat xidmətinin rəhbəri Pünhan Mürsəliyevin  sözlərinə görə, hazırda Bakı-Sumqayıt yolunun 9-cu kilometrində yeni yolötürücünün tikintisi aparılır, yeni ikizolaqlı yol çəkilir və avtomobillərin istənilən istiqamətə hərəkət etməsi üçün dairə tikiləcək.

Bu isə Bakı-Sumqayıt avtomobil yolunun buraxılış qabiliyyətini artırmağa imkan verəcək. Bundan başqa, yeni yolun inşası sayəsində hərbi hissədən (bu yolda yerləşən) yol polisi postuna çıxış təmin ediləcək. Əks istiqamətdə də xeyli işlər görülür. Xüsusilə Sulutəpə-Xocasən-Biləcəri yolunun (1,5 kilometr) 4 zolaqdan 8 zolağadək (hər istiqamətdə 4 zolaq olmaqla) genişləndirilməsi işləri görülür. Həmçinin, burada uzunluğu 110 metr olan yeni 3 zolaqlı yolötürücünün inşası aparılır.

Bu işlər başa çatdırıldıqdan sonra Sumqayıtdan hərəkət edən avtomobillər Xocasən və Biləcəri istiqamətində hərəkəti davam etdirə, "Şamaxinka" kimi tanınan ərazidən şəhərə daxil ola, Bakı-Şamaxı yolu, avtovağzal və atıcılıq kompleksi istiqamətində (gələcəkdə birinci dairəvi avtomobil yoluna çıxmaq) hərəkət edə biləcəklər.

İşlərin başa çatma tarixi isə hələ dəqiq açıqlanmır.

İbrahim Ocaqlı, Hafta.az