Abşeron sakinləri etiraz aksiyası keçirməyə hazırlaşır. Abşeron rayon Xırdalan şəhərindən Gunxeber.com-a daxil olan məlumata görə, “Azərsu” ASC Xırdalan şəhərinin quşçuluq massivi deyilən ərazinin sakinlərini sussuz qoyub. Hər gün səhər saat 8-dən axşam saat 23-ə qədər qeyd olunan əraziyə su verilmir. 

Sakinlər bildirirlər ki, hər gün “Azərsu” ASC-nin və Abşeron Su İdarəsinin qaynar xətti və Abşeron Rayon İcra Hakimiyyəti ilə əlaqə yaratsalar da onlara sadəcə bir cavab verilir: “Ceyranbatan su anbarında təzyiq yoxdur və ona görə də əraziyə su gəlib çatmır”. Hər il dövlət büdcəsindən “Azərsu” ASC yüz milyonlarla manat vəsait ayrılır. Həmin vəsait isə Ceyranbatan və digər su anbarlarının elektirik mühərriklərinin, hidroqurğularının təmiri, yenilənməsi adı altında xərclənir. Ancaq bu gün “Azərsu” ASC və Abşeron Su İdarəsi açıq şəkildə etiraf edirlər ki, Ceyranbatan su anbarında boruara vurulan suyun təzyiqi yoxdur. Halbuki Qorxmaz Hüseynovun qurumu hər il paytaxta və Abşeron yarmadasına verilən suyun təzyiqinin artırılması üçün müxtəlif mühərriklərin və hidroqurğuların alınması adı altında büdcədən külli -miqdarda vəsaitlər silirlər.

Sakinlərin bildirdiyinə görə, məsələ ilə əlaqədar dəfələrlə “Azərsu” rəhbərliyinə və Abşeron Rayon İcra Hakimiyyətinin başçısı Zakir Fərəcova müraciət etsələr də, onların problemi həll olunmayıb. Buna görə də, Xırdalan sakinləri Q.Hüseynov və Z.Fərəcovun laqeyd münasibətinə etiraz əlaməti olaraq aksiya keçirməyə hazırlaşırlar.

Qarşı tərəfin mövqeyini dərc etməyə hazırıq.

(gunxeber.com)