Azyaşlı qız uşaqlarının intihara cəhd etməsi son günlərin ən aktual problemlərindən birinə çevrilib.

Son bir həftəyə olan statistikaya nəzər yetirsək, vəziyyətin nə dərəcədə acınacaqlı olduğunu əyani şəkildə deyə bilərik.

Bu qəbildən olan faktlara baxaq:

*** Mart ayının 8-də Neftçala rayonunun 2-ci Mayak kəndində 11 yaşlı Kazımova Xədicə Rüstəm qızı yaşadıqları həyətdəki yarımçıq tikilidə özünü iplə asaraq intihar etdi. 11 yaşlı qızın intihar etməsinin səbəbi sirr olaraq qalmaqdadır.

*** Bir gün sonra, 9 mart tarixində növbəti intihara cəhd faktı qeydə alındı. Belə ki, Quba rayonun Dəvədabanı yaşayış massivində 2000-ci il təvəllüdlü İsgəndərova Nərmin Vüqar qızı yaşadığı evin yaxınlığında özünü qayadan atdı. O, Quba Mərkəzi rayon Xəstəxanasının reanimasiya şöbəsinə yerləşdirilib, hazırda reanimasiyadadır.

*** Bundan əvvəl də, 25 yanvar tarixində Sumqayıt şəhərində 15 yaşlı orta məktəb şagirdi Aydan Əsgərzadə özünü dənizə ataraq intihar etmişdi.

Göründüyü kimi, yaşları 10-16 aralığında dəyişən qızlar öz problemlərinin həllini intihar etməkdə görürlər.

Bəs problem nədən qaynaqlanır? Niyə məhz qız uşaqları?

Psixoterapevt Şəbnəm Sadıqova hesab edir ki, hazırda qız uşaqlarına qarşı acımasız münasibət var və problem bir neçə əsr əvvəlki vəziyyətlə eyni səviyyədə qalıb:

"Qeyd edim ki, intiharın cinsiyyəti yoxdur. Amma nəzərə almaq lazımdır ki, ölkəmizdə qız uşaqlarına qarşı münasibət çox fərqlidir. Qız usağı danışmamalıdır, dinməməlidir, təhsili olmamalıdır. Hər nə qədər danışsaq da, problem bir neçə əsr əvvəlki vəziyyətlə eyni səviyyədə qalıb. Sadəcə olaraq, texnologiya inkişaf edib. İnsanlar aldadılır ki, guya sadaladığımız problemlər artıq yoxdur. Azərbaycanda, xüsusilə də rayonlarda qız uşaqlarına qarşı acımasız münasibət var. İstər təhsil, istərsə də ailə həyatı qurmaq məsələlərində qız uşaqları o qədər çarəsizliklə üz-üzə qalırlar ki, bəzi hallarda intihara cəhd edirlər. Problemin bu dərəcədə dramatik olmasının səbəbi Azərbaycanda cahilliyin get-gedə artmasıdır”.



Psixoterapevt bildirdi ki, problemi həll etmək üçün bəzi mental dəyərlər qırılmalıdır:
"Problemi həll etmək üçün ilk növbədə sosial çevrələr yaradılmalıdır. Bu çevrələr ailələrə dəstək verməlidir. Övlad tərbiyəsi ilə məşğul olmaq üçün valideynlər təşviq olunmalıdır. Bundan əlavə bəzi mental dəyərlər qırılmalıdır. Bu dəyərlər qırılmadığı təqdirdə nə həmin sosial çevrələrə ailələr qoşulacaq, nə də valideynlər öz övladlarına qarşı münasibətlərini dəyişəcəklər. "Camaat nə deyər adlı düşməni” məhv etmədikcə biz heç bir ailəni xilas edə bilmərik. Ailələrdə trans-seksuallar da bir çox hallarda intihara cəhd edirlər. Cüzi araşdırma aparsaq, görərik ki, intihara cəhd edənlərin içərisində trans-seksualların sayı çoxluq təşkil edir”. 

Rəsmi məlumata görə, Azərbaycanda 2008-ci ildə 58, 2009-cu ildə 54, 2010-cu ildə 51, 2011-ci ildə 28, 2012-ci ildə 60, 2013-cü ildə 71, 2014-cü ildə isə 50 uşaq intihar edib.
Qeyd edək ki, ümumilikdə dünyada intihar hallarının 60%-i yaz-yay aylarında baş verir. Belə hesab edilir ki, intiharın əsasını, yəni 70%-ni depressiya təşkil edir. Ümumiyyətlə isə depressiya keçirən insanların 15%-i intihar edir. İntiharların 41%-nin səbəbi məlum deyil, 19% cəzalanma qorxusuna görə, 18% ruhi xəstəliyə, 18% evdəki məhrumiyyətlərə, 6% ehtirasa, 3% pul itkisinə, 1,4% həyatdan bezdiyinə, 1,2%-i isə fiziki xəstəliyə görə baş verir.
Femida.az