Bir vaxt Səməd Vurğunun şeirlərini bəzəmiş “göylərə baş çəkən” Göyəzən dağı bu günlərdə erməni mətbuatında gündəmə gəlib. 

ANS PRESS-in məlumatına görə, erməni bloger Ani Marqaryan Göyəzən dağının lap yaxınlığında yerləşən bir kənddə - Berkaber kəndində olub. Köhnə adı Coğaz olan kəndə baş çəkən Ani Marqaryan kənd camaatının güzəranına toxunub, miqrasiyanın güclənməsini və nikah sayının aşağı düşməsini kəndin əsas problemi sayıb. 

Dərc etdiyi məqaləsini fotolarla dəstəkləyən Ani Marqaryanın şəkillərində əsas fokus Qazax rayonunun Alpout və Sofulu kəndlərinin ərazisində yerləşən Göyəzən dağına yönəldilib. Yer səthindən 250 metr hündürlüyü olan bu dağ ətrafda yaşayan erməni kəndləri üçün Azərbaycanın simvoludur. Göyəzən dağının yaxınlığında Qafqaz Albaniyasının paytaxtı Xalxal (Lələ) şəhərinin xarabalıqları yerləşir. Qafqaz Albaniyasının sonuncu lideri Cavanşirin və xanımının qəbirlərinin yaxınlıqdakı məzarlıqlardan birində olduğu vurğulanır. 

Erməni bloger Ani Marqaryan məqaləsində kiçik erməni qızına Göyəzən dağını göstərərək “Gəl o dağa tərəf gedək” deyir. Qız isə təbii ki, valideynlərinin öyüdünü nəzərə alaraq o dağa tərəf getməyin qorxulu olduğunu söyləyir. Ani Marqaryan məqaləsinin sonunda vurğulayır ki, əgər bu uşaqlar vətənpərvər, savadlı və güclü olarlarsa, o dağa tərəf çəkinmədən gedərlər, qoxduqları bu çayın suyunda rahatca balıq tutarlar. 

Yəni erməni jurnalist sətiraltı kəlmələrlə böyüməkdə ona nəslə başa salır ki, vətənpərvər erməni gəncləri məhz Azərbaycanla münasibətləri qaydaya salmalıdırlar. Bunun üçünsə erməni gəncləri savadlı olmalıdırlar. Məhz savadlı adamlar anlayır ki, dövlətin gücü heç də onun nəzarətdə saxladığı ərazilərlə deyil, qurduğu əlaqələri və iqtisadi potensialı ilə ölçülür. Bu baxımdan hazırda Ermənistanın təkəri geriyə işləyir. Ermənistan sovet rejiminin yaratdığı şəraitdən istifadə edərək Azərbaycan torpaqlarını işğal etməklə sovet dövrü ilə müqayisədə nəzarətdə saxladığı əraziləri 50%-ə qədər artırıb. Amma Cənubi Qafqazda nüfuzu sovet dövrünə baxanda qat-qat aşağı düşüb. Vaxtilə ermənilər Ermənistanla yanaşı Azərbaycanda da, Gürcüstanda da müəyyən nüfuza sahib idilər, indi isə heç Ermənistanın özündə belə nüfuzları yoxdur - ölkə getdikcə daha çox Rusiyanın müstəmləkə asılılığına yuvarlanır, bütün iqtisadi rıçaqlar Rusiya şirkətlərinin əlinə keçir. Erməni əhali Cənubi Qafqazı tərk edir. Əgər 1990-cı ildə Cənubi Qafqazda 4 milyondan çox erməni yaşayırdısa, hazırda 2,5 milyon qalıb. Azərbaycanlıların sayı isə əksinə 2 dəfə artaraq 9 milyonu keçib. Kimin gücləndiyi göz qabağındadır.