Azərbaycan vətəndaşları hərbi mükəlləfiyyətlə bağlı arayışları və itirilmiş hərbi biletlərin əvəzinə yenisini "ASAN xidmət" mərkəzlərindən də ala biləcəklər. FaktXəbər-in verdiyi məlumata görə, bu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən təsdiq edilib.

Azərbaycan vətəndaşları yaşayış yeri üzrə qeydiyyata alınarkən və qeydiyyatdan çıxarkən hərbi mükəlləfiyyətlə bağlı, yəni hərbi xidmətkeçmə haqqında arayışın verilməsi, eləcə də itirilmiş hərbi biletlərin (ilkin hərbi qeydiyyata alınma haqqında vəsiqələrin) əvəzinə yenisinin verilməsi üçün Səfərbərlik və Hərbi Xidmətə Çağırış üzrə Dövlət Xidmətin rayon şöbələri ilə yanaşı, "ASAN xidmət" mərkəzlərinə də müraciət edə biləcəklər.

Hazırda bununla bağlı işlər "ASAN xidmət"də Dövlət Xidməti ilə birgə test rejimində sınaqdan keçirilir. Sistemin sınağı uğurla başa çatarsa, xidmət yaxın günlərdə vətəndaşların istifadəsinə veriləcək.