"TİAMO KİDS” bir yaşını özündən "yaşca böyük” – 5-6 yaşlı körpə-fidan balalarla birgə bayram etdi 

Yurdumuzun hər yerində Novruz bayramının təntənə ilə qeyd olunduğu bu günlərdə Sumqayıtda bir il əvvəl yaradılmış məktəbəqədər "TİAMO KİDS" dahi uşaqlar mərkəzi özünün ad gününü balaca yetirmələri ilə birgə bayram etmişdir.

Baharın gəlişinin sevinc dolu ovqatının və xoş ətrinin duyulduğu, bayramsayağı bəzədilmiş geniş bir salonda Novruz nemətləri – paxlava, şəkərbura, digər şirniyyat və meyvələr, tortlar, milli mətbəximizin ləziz təamları düzülmüş masalar arxasında anaları ilə birgə əyləşən gələcək "dahilər”in çöhrələrində Novruz şölələri duyulurdu. Böyüklü-kiçikli 150 nəfərin toplaşdığı, türk-müsəlman dünyasının ən əziz bayramı münasibətilə bir-birini sevinclə təbrik etdiyi salonda səslənən həzin musiqi sədaları, oxunan populyar mahnılar və təbii ki Novruz nəğmələri bayram ab-havasını daha da coşdurur, xoş duyğular oyadırdı.

Tədbirin balaca iştirakçılarını, onların valideynlərini və qonaqları səmimiyyətlə salamlayan "TİAMO KİDS dahi uşaqlar” Mərkəzinin direktoru İradə xanım Xəlilova zala toplaşanların şəxsində bütün sumqayıtlıları, şəhərin balaca sakinlərini Baharın gəlişi münasibətilə təbrik edərək, doğma Sumqayıta, bütün xalqımıza yüksək inkişaf və rifah arzulamış, Mərkəzin fəaliyyəti ilə bağlı videosüjetlərlə müşayiət olunmaqla geniş məlumat vermişdir.

Bəlli oldu ki, cəmi bir yaşı olmasına baxmayaraq, Mərkəzin rəhbərliyi və pedaqoji kollektivi 3 yaşından 6 yaşına qədər olan uşaqların məktəbə hazırlığı, onların erkən intellektual inkişafı üçün xeyli işlər görmüş, balacaların oxuyub-yazmaq həvəs və qabiliyyətlərinin artırılması, hələ rüşeym halında olan istedadlarının cilalanması, "vunderkind” kimi yetişmələri üçün səylə, yorulmadan çalışmaqdadırlar.

Bildirilmişdir ki, fəaliyyət devizi "Əylənərək öyrənək, iInkişaf edək!” olan Mərkəzdə təlim-tərbiyə kursları keçən balacalar adətən məktəblərdə uşaqların əməl etməli olduqları müəyyən "əsgəri intizam”dan fərqli olaraq, dərsləri və təlimləri uşaq sərbəstliyi şəraitində keçirlər ki, bu da onları "çərçivə sindromu”ndan azad edir, düşüncə-fantaziyalarının və fəallıqlarının məhdudiyyətsiiz, geniş olmasına səbəb olur.

- Mərkəzimizdə fəaliyyət göstərən kurslar xeyli dərəcədə əyləncəli olduğu üçün uşaqlar bizim uşaq psixologiyasını yaxşı bilən gənc, lakin peşəkar müəllimlərimizin dərs və təlimlərinə böyük diqqət və maraq göstərirlər, - deyə Mərkəzin rəhbəri İradə xanım tədbir iştirakçılarına daha geniş məlumat verməyə çalışaraq, "TİAMO KİDS”in ad günü və Novruz bayramı sevincini onlarla bölüşməkdən fərəh duyur. – Daim səslənən çox doğru bir fikir var ki, "uşaqlar bizim gələcəyimizdir”. Onların illər sonra peşəkar və savadlı kadrlar kimi yetişməsində isə, əlbəttə ki, təhsilin optimal təşkilinin, uşaqların bilik, bacarıq və qabiliyyətlərinin vaxtında və düzgün istiqamətləndirilməsinin əhəmiyyəti böyükdür. Dərs və təlimlərin uşaqlara ən müasir, interaktiv metodlarla aşılanmasına, onların zehni inkişafının sürətlənməsinə nail olmaq üçün Mərkəzimizdə hər cür şərait yaradılmış, Türkiyədən və digər ölkələrdən müxtəlif və maraqlı əyani vasitələr, əyləncəli intellekt-zəka oyunları, noutbuklar vəs. alınıb gətirilmişdir.

Marqlıdır ki, Mərkəzdə ilk gündən etibarən uşaqlarda nitqin inkişafı və fikrin ifadə edilməsi üzrə təşkil olunan dərslər onların digər təlim və dərsləri yaxşı mənimsəmələrində mühüm rol oynayır. Xüsusi metodika ilə ingilis dili kurslarının, mental arifmetikanın tədrisi, sürətli oxuma təlimləri, həmçinin ana dili üzrə, ətraf aləm haqqında keçilən dərslər uşaqların böyük həvəs və marağına səbəb olur, onların məktəb həyatına hazırlığında mühüm yer tutur.

Diqqətəlayiqdir ki, fəaliyyətə başladığı elə ilk aylarda Mərkəzin şagirdləri şəhər üzrə keçirilən olimpiadalarda medallara layiq görülmüş, xüsusi kuboka sahib olmuşlar. Bu uğurların qazanılmasında "TİAMO KİDS”-in gənc müəllimləri tərəfindən uşaqların yaddaşının, tez qavrama qabiliyyətlərinin artırılmasına səbəb olan elektron dərsliklərin hazırlanması xüsusi əhəmiyyət kəsb etmişdir.

Bütün dərs və təlimlər zamanı uşaqların diqqət və məntiqini gücləndirən oyun və oyuncaqlardan, noutbuklardan, elektron dərsliklərdən, məqsədli cizgi filmlərindən istifadə balacaların dərsləri daha tez mənimsəməsinə kömək edir, onların məktəbə hazırlıq səviyyəsini daha da artırır. Yaddaş kurslarında uşaqlara öyrəndiklərini uzun müddət yadda saxlama metodları, həmçinin mürəkkəb hesablamaları əyləncəli yolla, asan yerinə yetirmə üsulları öyrədilir ki, bu da onların biliklərinin, təfəkkürünün formalaşmasında və inkişafında mühüm rol oynayır. Bu məqsədlə bəzən uşaqlara çətin görünən riyazlyyatın asan qavranılması üçün Türkiyədən alınmış xüsusi təlim-tədris metodikasından - "matplus” proqramından səmərəli istifadə olunur.

Uşaqların dərs və təlimlərinin daimi olaraq nəzarətdə saxlanılması, müəllim-şagird-valideyn əlaqələrinin möhkəm olmasını təmin etmək məqsədilə Mərkəzdə hər ay açıq dərslər keçirilir ki, bu zaman valideyn də bilavasitə dərslərdə iştirak edir. Bir növ müəllim də, uşaq da valideyn qarşısında hesabat verir ki, bu da hər üç tərəfin məsuliyyət və diqqətini artırır. Bundan əlavə hər ayın sonunda uşaqların dərs və təlimlərdə iştirakını, qabiliyyətlərini, onların əl işlərini əks etdirən fərdi albomlar tərtib olunur ki, valideynlər onların vasitəsilə öz övladlarının bilik və bacarıq inkişafını ardıcıl olaraq izləmək imkanı əldə edirlər. İlin sonunda isə valideynlərə onların övladlarının dərs və təlim dövründəki fəaliyyətləri, uğurları haqqında elektron formada tam məlumat təqdim olunur.

Mərkəzdə Uşaq studiyası da fəaliyyət göstərir ki, orada da balacaların zehni bə bədii zövqlərinin inkişafı üçün şahmat və rəsm, milli rəqslər də öyrədilir. Uşaqların mümkün ola bilən nitq-danışıq qüsurlarını aradan qaldırılması məqsədilə Mərkəzdə loqopedik mərkəzin, psixoloqun fəaliyyət göstərməsi də diqqətəlayiqdir.

Bütün bu deyilənlər bir yaşı tamam olan "TİAMO KİDS”-in tədbir iştirakçıları qarşısında birillik hesabatı kimi yüksək qiymətləndirilərək, alqışlarla qarşılanmışdır.

Mərkəzin yetirmələrinin istedad və qabiliyyətlərinin nümayişi olaraq onların tədbir iştirakçıları qarşısında saniyələr ərzində bir-neçə çoxrəqəmli ədədin toplanıb-çıxılması, vurma-bölmə əməliyyatlarının dəqiqliklə yerinə yetirilməsi, hətta ədədlərin çox asanlıqla kvadrata yüksəldilməsi üzrə bacarıqları heyrətə və alqışlara səbəb olmuşdur.

Daha sonra balacalar sevimli Novruz personajları olan Bahar qız, Keçəl və Kosa ilə oynayıb-əylənmiş, hətta özləri də həvəslə "rola girərək”, dahi bəstəkarımız Üzeyir Hacıbəyovun məşhur "Arşın mal alan” tamaşasından "Arşınmalçı Əsgər”in qızlara arşın malı paylaması səhnəsini nümayiş etdirmiş, "Cücələrim” mahnısını teatrlaşmış şəkildə ifa etmiş, bütün tədbir iştirakçıları ilə birgə "Yallı” getmişlər.

Tədbirin sonunda fəxri qonaqlar - "Demokratik Cəmiyyət və qadın Hüquqlarının Müdafiəsi” İctimai Birliyinin və "Hüquqşünas Qadınlar” Assosiasiyasının təsisçisi və sədri Mehriban Abdullayeva, "Tərəqqi” sosial-iqtisadi inkişaf İctimai Birliyinın sədri İndira Şəmsivari, "Xəbərlə.com” saytının əməkdaşı Kamal Almuradlı və digərləri çıxış edərək, "TİAMO KİDS”-in rəhbərliyini və onun ilk yetirmələrini Mərkəzin ad günü və Novruz bayramı münasibətilə təbrik etmiş, onlara uğurlar arzulamışlar.

Bayram tədbirləri uşaqların iştirakı ilə bir-neçə gün ərzində yaxınlıqdakı mirkorayonlarda da davam etdirilmişdir.

Mövzuya dair keçid linkləri:
https://www.youtube.com/channel/UCEhC2yC-S64QVxTTFrhxJPA 

https://www.facebook.com/TiamoKidsSumqayit/ 

https://www.instagram.com/tiamokidsdahiushaqlar/