Dini Qurumlarla İş üzrə Dövlət Komitəsi 2001-ci il iyun ayının 21-də yaradılıb. Əsas fəaliyyət sferası dini fəaliyyət sahəsində dövlət siyasətinin həyata keçirilməsini təmin etmək və dini qurumlarla bağlı qanunvericiliyin müddəalarına riayət olunmasına nəzarət etməkdir.

Qurumun indiyə qədər 3 sədri olub.

Dördüncü sədr isə Prezidentin bugünki sərəncamından sonra millət vəkili Mübariz Qurbanlı təyin edilib.

Modern.az saytı komitənin sədrləri və onların mənsub olduqları ixtisaslar barədə yazını təqdim edir:

 Rafiq Əliyev

Komitə yarananda sədr kürsüsünə ilk təyin olunan Rafiq Əliyev ixtisasca şərqşünasdır. R.Əliyev ictimai həyata elə elmdən gəlib. Belə ki, o, 1985-1998-ci illərdə Elmlər Akademiyası Şərqşünaslıq İnstitutunda din tarixi bölməsinin müdiri kimi çalışıb. Daha sonra isə institutda xarici əlaqələr üzrə müdir təyin olunub. R.Əliyev 2001-ci il iyunun 21-dən 2006-cı il iyunun 25-ə qədər bu komitənin sədri vəzifəsində çalışıb.

Hidayət Orucov

Bakı Dövlət Universitetinin filologiya fakültəsinin məzunu olan H.Orucov “Sovet Ermənistanı” qəzetində elmi işçi, İrəvan Dövlət Dram Teatrında isə direktor vəzifəsində çalışıb. Ədəbi mühitdə Hidayət adı ilə tanınan yazıçı, eyni zamanda, Ermənistan Yazıçılar İttifaqının Azərbaycan Ədəbiyyatı Şurasına rəhbərlik edib, İrəvan Pedaqoji İnstitutunun Azərbaycan şöbəsində XIX-XX əsr Azərbaycan ədəbiyyatından dərs deyib. H.Orucov 2005-ci il iyunun 25-dən 2012-ci il mayın 31-nə qədər dini komitənin rəhbəri olub.

 Elşad İskəndərov

İxtisasca tarixçi olan Elşad İskəndərov komitədə sələflərinə nisbətən az müddətdə sədr kimi çalışıb. Onun rəhbərlik müddəti 2012-ci il mayın 31-dən 2014-cü il mayın 2- nə qədərdir. E.İskəndərov Qərb təhsili görən kadrlardandır. Belə ki, o, ABŞ-ın Kolumbiya Universitetinin tarix ixtisası üzrə magistr olub. 2004-cü ildə Dialoq və Əməkdaşlıq uğrunda İslam Konfransı Gənclər Forumunun baş katibi seçilən E.İskəndərov həmçinin 2009-cu ildə prezident İlham Əliyev tərəfindən Azərbaycan Respublikasının fövqəladə və səlahiyyətli səfiri rütbəsini alıb.

Mübariz Qurbanlı

Bu gün Dini Komitəyə təyin olunan yeni sədr Mübariz Qurbanlını isə təqdim etməyə xüsusi ehtiyac yoxdur. Onu kimi Milli Məclisdən deputat, kimi YAP-dan siyasətçi, kimi də televiziya ekranlarından politoloq kimi tanıyır. İxtisasca tarixçi olan M.Qurbanlı həm də tarix elmləri namizədi, dosentdir. Çoxsaylı elmi, elmi-publisistik, nəzəri, politoloji məqalələrin və bir neçə kitabın müəllifidir.

Elmin NURİ