Hərbi ekspert, ehtiyatda olan polkovnik-leytenant Üzeyir Cəfərov Qarabağ qaziləri və veteranların ölkə başçısı İlham Əliyevə müraciət etməsinə münasibət bildirib.

İnterAz -ın məlumatına görə, ekspert öz facebook səhifəsində bu müraciətə öz etirazını bildirib.

O, qeyd edib: "Hörmətli Qarabağ qaziləri və veteranları! Mən Sizin bu müraciətinizə qəti etirazımı bildirirəm. Niyəsini və səbəblərini qısaca burda yazacağam. Xahiş edirəm yazdıqlarımı soyuq başla və təmkinlə qarşılayasınız. Əziz qardaşlarım, bu necə bir ölkədir ki, əgər hər şeyi ölkə prezidenti həll edəcəksə, onda bizim bu nazir və komitə sədrləri nə üçün vəzifədə saxlanılırlar? Əgər ölkə qanunlar ilə deyil, fərdlərin-şəxslərin göstərişi ilə idarə edilərsə, onda vay olsun halımıza. Mənim əzizlərim, Sizin müraciətinizdə xeyli sayda yerində olmayan fikirlər və ifadələr var ki, şəxsən mən onlara dərin təəssüf edirəm. Vətəninin azadlığı və bütövlüyü uğrunda canını, sağlamlığını fəda edən insanlar ən yüksək zirvədə durmağa layiq şəxslərdir.

Mənim düşüncəmə görə onlar hamıdan yüksəkdə durmağı öz həyatları bahasına qazanmış şəxslərdir. Bir sözlə, mən Sizin belə metodlarınızı başa düşürəm, amma atdığınız addımı dəstəkləmirəm. Gəlin öz Qürurumuzu qoruyaq. Qoy Azərbaycan adlı məmləkətin rəhbər şəxsləri nəhayət ki, müharibə acısı yaşamış azsaylı vətəndaşlarının problemini ləyaqətli şəkildə həll etsin. Onda belə müraciətlərə ehtiyac da olmaz. Hamınızı çox istəyirəm, amma soyuq başla nə demək istədiyimi bir qədər dərindən təhlil etməyinizi Sizdən xahiş edirəm."