Yazar Hacı Zamin "Feysbuk" səhifəsində cəbhə xəttində  gedən son döyüşlərdə qəhrəmancasına şəhid olan polkovnik-leytenant Raquf Orucovla bağlı ağrılı xatirəsini paylaşıb.
Xeberle.com həmin yazını təqdim edir:
Neçə gündür bu polkovnikə baxıram, fikirləşirəm onu hardan tanıyıram. Tapa bilmirdim. Ehtimalım var idi. Bu gün dəqiqləşdirdim. 1999-cu ildə Murovda əsgərlikdə olarkən həmin bu Orucov ordakı bizim briqadanın kəşfiyyat bölüyünün komandiri idi. Haqqında əfsanələr danışırdılar. Deyirdilər Kəlbəcərə gedib, ermənilərin bütün razvodunu (səhər düzülüşü), qərargahını-filanı videoya çəkib gəlib. Buna görə "İgidliyə görə" medalı almışdı. Doğrudan da çox igid adam idi. Belə insanlar dünyaya tək-tək gəlir. 1999-un yayında təsadüfən lap yaxından tanımışdım onu. Mən jurnalist kimi ordudan yazdığım üçün, Əbiyevin cəzası olaraq Murova xidmətə göndərilmişdim. Orda da gördüklərimi gizlicə qələmə alırdım, gündəlik tuturdum. Bir gün yenə Kürəkçayın qırağında gizlin oturub bloknota qeydlər edərkən kimsə əlimi arxadan tutdu (əsl kəşfiyyatçı - elə gəlmişdi xəbərim olmamışdı). Diksindim. Gördüm bir gənc zabitdir. O vaxt deyəsən kapitan idi, yadımda dəqiq qalmayıb, amma gündəliyimdə deyəsən qeydlər olmalıdır.
Bloknotum əlində idi, açıb başladı oxumağa, gülümsündü. Mən də açığı qorxdum ki məni qərargaha satacaq, cəzalanacam-filan. Amma ağardığımı görüb güldü, dedi ki, qorxma, mən də sənin kimi əsgərəm, yazdıqların hamısı da düzdür. Bizdən azca aralıdan Göygölə yol gedirdi. O yola baxıb kədərlə dediyi sözlər yadımdan çıxmır: "Mən ailəmə pul göndərə bilmirəm, varlıların uşaqları burda maşınla şütüyür". Onun zamanında bizim kəşfiyyat bölüyü bütün korpusda birinci idi. Hətta poliqonda təlim zamanı "şturmavoy briqadanın" kəşfiyyat bölüyünü "əsir" götürmüşdülər. Adam o cür ağır şəraitdə əsgərləri üçün saunaya bənzər hamam düzəltmişdi! Bir-iki dəfə mən də gedib çimmişdim.
Çox peşəkar, cəsur adam idi. Son döyüşlərdə həlak olub. Polkovnik Raqub Orucov. Ağdamda doğulmuşdu. Orucov, bağışla ki, bu ölkə sənə layiq olmadı.