2015-ci il ərzində 2017 narkoman qeydiyyata götürülüb.
APA-nın xəbərinə görə, Respublika Narkoloji Mərkəzin direktoru Telman Məmmədhəsənov Azərbaycan Dövlət Həkimləri Təkmilləşdirmə İnstitutunda "Respublikamızda narkoloji xidmətin müasir vəziyyətinə həsr olunan dəyirmi masada çıxışı zamanı deyib ki, dispanser qeydiyyatında olanlar – 1432 nəfər, profilaktik - 585 nəfər (o cümlədən, opioidlərin qəbulu nəticəsində - 1224 nəfər, kannabioidlərin qəbulu nəticəsində - 793 nəfər) təşkil edib. Onun sözlərinə görə, hazırda respublika üzrə 31.12.2015-ci il tarixinə qeydiyyatda olan narkomanların ümumi sayı 28 555 (o cümlədən opioidlərin qəbulu nəticəsində - 20036 nəfər, kannabioidlərin qəbulu nəticəsində - 8519 nəfər) dispanser qeydiyyatında olanlar – 23153 nəfər, profilaktik - 5402 nəfər, anonim müalicə alan – 583 nəfər, toksikoman 158 nəfər təşkil edib. Narkotik istifadəçilərinin 592 nəfərinin  qadın olduğunu deyən direktor qeyd edib ki, 2015-ci ildə 2833 nəfər könüllü müalicə almaq üçün Mərkəzə müraciət edib: "Nazirlər Kabinetinin qərarı ilə ölkəmizdə "Narkomanlıq xəstəliyinə düçar olan şəxslərin müalicəsində istifadə olunan əvəzedici müalicə proqramlarının tətbiqinin Şərtləri və Qaydaları” təsdiq edilib. Bu proqramlar inyeksion yolla narkotik maddələr istifadə edənlər arasında İİV/QİÇS-in yayılmasının qarşısını almağa yönəlib. Son üç il ərzində Metadonla əvəzedici müalicə proqramı üzrə fəaliyyət göstərən iki məntəqədə 424 xəstə müalicə alıb. 2015-ci ildə Ədliyyə Nazirliyi tərəfindən Respublika Narkoloji Mərkəzinə göndərilmiş şəxslərin məhkəmə-narkoloji tibbi yoxlaması təmin olunub. Respublika üzrə 2015-ci il ərzində ekspertizadan cəmi 3111 nəfər keçib. Onlardan 1577 nəfərə məcburi müalicə təyin olunub. Mülki işlə bağlı narkoloji tibb müəssisəsində məcburi müalicədə olan narkomanlıq xəstəliyinə düçar olan şəxslərin ümumi sayı 13 nəfərdir".
T. Məmmədhəsənov əlavə edib ki, Bakı, Sumqayıt, Lənkəran, Mingəçevir şəhər narkoloji dispanserləri və bir sıra Mərkəzi Rayon Xəstəxanalarının narkoloji kabinetlərinin nəzdində, ümumilikdə, 48 könüllü məsləhət və müayinə məntəqəsi təşkil edilib. Onun sözlərinə görə, 2015-ci il ərzində məntəqələrdən 44 278 nəfər şəxs müayinədən keçib: "2015-ci ildə Respublika Narkoloji Mərkəzində 30655 nəfər sərxoşluq hallarının bütün növlərinin təyini məqsədi ilə aparılan tibbi müayinədən keçib”.