Qarabağ müharibəsi çox evlərdə, ocaqlarda nisgil qoyub. Vətən yolunda sağlamlığını itirən qazilərimizlə yanaşı, canını fəda edənlər də çoxdur. Onlardan biri də Səlimov İbrahim Mətləb oğludur. Cəbhədə düşmənə aman verməyən İbrahim son nəfəsində də Vətən, Bayraq, Millət dedi. Səlimov İbrahim Mətləb oğlu 1972-ci ildə anadan olub. Orta məktəbi bitirdikdən sonra Boru prokat zavodunda işləyib. Daha sonra Sumqayıt Dövlət Dram teatrında aktyorluq fəaliyyətinə başlayıb. İlk dəfə olaraq 1991-ci ildə döyüşə gedib. 1992-ci ildə birinci dəfə ayağından yaralanıb. Yaralı vəziyyətdə olduğu üçün Biləcəri hospitalında müalicə alır. Yarası sağalmamış evə gəlmir və yenidən döyüşə qayıdır. Yaxınları deyir ki, ona baş çəkmək üçün yanına gedəndə o, artıq cəbhədə idi.

Xülasə... 1993-cü ildə Ağdərədə, Sırğavənddə gedən döyüşlərdə qarnından ağır yaralanır. Cəbhə yoldaşları deyirdi ki, çanağın yarısı və ombanın özü yox idi, dağılmışdı. Bu yaralar onun sonrakı sağlamlığına çox pis təsir göstərdi. Müharibə şəraiti olduğu üçün xəstəxanalar yararsız vəziyyətdə idi. Qanköçürmə zamanı heç bir təmizliyə riayət olunmurdu. Kimdən olur olsun, qan çəkilib yaralılara vurulurdu. Bunun nəticəsində də hepatit virusu keçmişdi. Tədricən bu xəstəliklər böyüdü və son bir neçə ildə çox əziyyət çəkirdi, bütün bədəni fəaliyyətdən düşmüşdü.

Bir məsələni də qeyd edək ki, o, bu cür ağır şəraitlərə düşsə də, heç vaxt peşman olmadı. Hətta bəzən ona etiraz eləyərdilər ki, bax, getdin sağlamlığını itirdin, amma o, yenə bunun müqabilində peşmançılıq hissi keçirmirdi. Heç kimə minnət də eləməzdi ki, mən gedib Qarabağda döyüşmüşəm, yaralanmışam. O vaxtı Sumqayıtda Oktyabrlar klubu var idi. O həmin klubun üzvü idi. Sumqayıt Dram Teatrında bir çox rolları ifa edib. Hətta cəbhədə yaxşı döyüşdüyünə görə, Fəhmin Hacıyev 3-4 nəfərə zabit rütbəsi vermişdi ki, biri də o idi. Bayrağımıza qarşı xüsusi sevgisi var idi. Bayrağı evdə qonaq otağına qoymuşdu. Amma indi nadir hallarda rast gəlmək olar ki, kimsə qonaq otağına bayraq qoysun.

Son vəsiyyətində də qardaşına təkidlə demişdi ki, məni Qarabağ əlili kimi dəfn edin və tabutuma Azərbaycanın bayrağını sərin.

Allah rəhmət eləsin!

(mia.az)