Azərbaycanda ali təhsil müəssisələrinin dünya standartlarına cavab verməsi və daim təkmilləşdirilməsi istiqmaətində işlər aparılır. Xüsusilə tələblərin daha yaxşı təhsil verən ali təhsil müəssisələrinə üz tutmaları da artıq ali təhsil müəssisələrinin özlərini təkmilləşdirməsini vacib edir.

Zaman-zaman bu və ya digər ali təhsil ocaqlarında müəllimlərin müəyyən məbləğ qarşılığında tələbələrə qiymət yazdıqları və belə öyrəncilərin hansı biliyə sahib olduqları ilə hər birimiz qarşılaşmışıq.

Bu gün belə faktlar əvvəlki illərə nisbətən azalsa da, müəyyən ali məktəblərdə qalmaqdadır. Korrupsiyalaşan universitetlər sırasında xüsusilə Gəncə və Sumqayıt dövlət universitetlərini qeyd etmək olar.

Bunu hər iki universitetdən daxil olan şikayətlər də təsdiqləyir. Hər iki universitet barədə artıq cəmiyyətdə mənfi rəylər oturuşub və həmin ali təhsil ocaqlarından danışıldıqda burada tələbə üçün hər şeyin pul ilə həll edildiyi xüsusi vurğulanır.

Sumqayıt Dövlət Universitetinin (SDU) eks-rektoru Nadir Qəhrəmanovun işdən çıxarılması, onu Elxan Hüseynovun əvəzləməsi heç də problemlərin həllinə kömək etmədi.

Hər sessiyada tələbələrə imtahan fənkərinin "qiymətləri” bildirilir və əvvəlcədən pullar yığılır, vermiyənlərin isə kəsirləri qalır və bu kəsirlər üçün əlavə ödəniş etmək məcburiyyətində qalırlar. Üstəlik tələbələrə III kursdan bildirilir ki, dövlət imtahanı üçün müəyyən edilmiş məbləği əvvəlcədən versinlər ki, onlar IV kursda "əziyyət çəkməsinlər”.

Sumqayıt Dövlət Universiteti üçün qeyd etdiyimiz faktlar Gəncə Dövlət Universitetində də mövcuddur.

Bura daxil olan tələbənin sevinci qısa müddət çəkir. Az qazanclı ailə övladının ali təhsil ocağına daxil olma sevincini tam yaşamamış, rüşvətli problemlər qalaq-qalaq üstünə yığılır. (Modern.az)