"Sumqayıt” klubunun müdafiəçisi Vurğun Hüseynovun müsahibəsini təqdim edir.
- Əsas hədəfiniz olan ölkə kubokunda mübarizəni dayandırdız. 1/4 finala adlamağa nə mane oldu?
- "Bakı”nı məğlub edəcəyimizə inanırdıq. Əslində oyunda üstün tərəf biz olduq. 4 təkbətək epizodda qol şansını qaçırdıq. Penaltilər seriyasında da udmaq şansımız olsa da, bundan da yararlana bilmədik.
- Yeri gəlmişkən, penaltilər seriyasında qeyri-dəqiq zərbə vurmaqla, komandanın məğlubiyyətinə səbəb oldunuz...
- Mən də bunu istəməzdim. 6-cı penaltini mən yerinə yetirməli oldum, ancaq istəyimə çatmadım.
- İki gün sonra çempionatda "Simurq”la vacib oyuna çıxacaqsız. Kubokdakı uğursuzluqdan sonra bu görüşdə qələbə qazanmaq şansınız var?
- Düzdür, kubokdakı uğursuzluq bizə pis təsir etdi. Amma toparlanmaq lazımdır. 8 oyundur qələbəyə həsrət qalmışıq. Son oyunlarda cəmi 2 xal toplaya bilmişik. Tilsimi qırmaq istəyirik.
- Zaqatalada "Simurq”dan dramatik məğlubiyyət almışdınız. Revanş almaq üçün əlinizə yaxşı imkan düşüb...
- Həmin oyunu yaxşı xatırlayıram. Matçın gedişində 2 top fərqi ilə önə keçmişdik. Amma sonradan qapımızdan 3 top buraxaraq, məğlub olduq. Bu dəfə isə nəyin bahasına olursa-olsun, qələbə qazanmaq istəyirik. Çünki oyun öz meydanımızda keçiriləcək. Azarkeşləri sevindirmək borcumuzdur.
- "Sumqayıt”la müqavilənizin müddəti may ayına kimidir. Rəhbərlikdən yeni sözləşmə təklifi almısız?
- Xeyr. Rəhbərlik mənə yeni müqavilə ilə bağlı müraciət etməyib. Bir də ki, hələ mövsümün sonuna var.
- Başqa klublardan necə, təkliflər gəlir?
- Dəqiq bir şey yoxdur. 1-2 klub maraqlansa da, rəsmi təklif almamışam.
- Maraqlanan klubların adlarını açıqlaya bilərsiniz?
- Ad çəkmək istəmirəm. Sadəcə onu deyə bilərəm ki, çempionluğa iddialı klublardır.(apasport.az)
Xəbərdən istifadə edərkən istinad etmək vacibdir.
