Bakalavr və magistratura təhsilini fərqlənmə diplomu ilə başa vuran Elnarə müəllimə hazırda Saray qəsəbəsindəki 3 nömrəli orta məktəbdə fizika müəllimi kimi çalışır.
Sumqayıt şəhərində yaşayan Elnarə müəllimə, bu il müəllimlərin sertifikasiya imtahanında yüksək nəticə göstərərək həm öz peşəkarlığını bir daha sübut edib, həm də müəllimlik sənətinin zəhmət və əzmkarlıq tələb edən bir yol olduğunu bizə xatırladıb. Xeberle.com-un əməkdaşı onunla bu uğurun arxasında dayanan səbəblər, şagirdlərlə iş prinsipləri və müəllimlik peşəsinin mənəvi tərəfləri barədə həmsöhbət olub:
Özünüz haqqında məlumat verin
– Mən, Süleymanova Elnarə, bakalavr və magistratura təhsilimi fərqlənmə diplomu ilə başa vurmuşam. Hal-hazırda Saray qəsəbəsində yerləşən 3 nömrəli orta məktəbdə fizika müəllimi kimi fəaliyyət göstərirəm. Sumqayıt şəhərində yaşayıram.
Bu il yüksək nəticə göstərməyinizin əsas səbəbləri nələrdir?
– Bu il yüksək nəticə əldə etməyimin əsas səbəbi davamlı və yorulmadan üzərimdə çalışmaq, dayanmadan hazırlaşmaq olub. Hansı müəllifdən olmasından asılı olmayaraq, sosial şəbəkələrdə fizikaya dair yeni test və ya tapşırıq kitabları çıxan kimi, hələ satışa çıxmamış müəlliflərlə əlaqə saxlayaraq bu vəsaitləri əldə edirdim. Elə kitablar olub ki, onları 3 gecə fasiləsiz işləyərək tamamlamışam.
Şagirdlərdə marağı artırmaq üçün hansı üsullardan istifadə edirsiniz?
– Fizika fənninə marağı artırmaq üçün dərsləri sadə və başa düşülən dildə izah etməyə çalışıram. Əyani vəsaitlərdən istifadə edərək dərsin daha maraqlı və praktik keçməsini təmin edirəm.
Müxtəlif səviyyəli şagirdlərlə necə işləyirsiniz?
– Şagirdləri səviyyələrinə görə özlüyümdə qruplaşdırıram. Hər qrup üçün uyğun çətinlikdə tapşırıqlar hazırlayıram. Hətta bəzən onların səviyyəsindən bir qədər çətin olan suallar da verirəm ki, özlərini sınaya və inkişaf etdirə bilsinlər.
Qiymətləndirmədə hansı yanaşmaları əsas tutursunuz?
– Əsas meyar şagirdin biliyidir. Lakin çalışqanlıq və intizam da mənim üçün vacib amillərdəndir. Məsələn, əgər bir şagirdin biliyi 4 və 5 arasında dəyərləndirilirsə, onun çalışqanlığı və dərsə yanaşması da nəzərə alınır.
Müəllimlik sizə nə ifadə edir?
– Müəllimlik mənim üçün yalnız bilik ötürmək deyil, eyni zamanda tərbiyə və təlim verməkdir. Bu, valideyn–müəllim–şagird üçbucağının harmoniyası deməkdir. Hər üç tərəf birgə işlədikdə daha uğurlu nəticələr əldə etmək mümkündür.
Müəllim kimi sizi ən çox qürurlandıran an hansıdır?
– Şagirdlərimin uğurları və nəticədə həm onların, həm də valideynlərin sevincini görmək mənim üçün ən böyük qürur mənbəyidir.
Sertifikasiya nəticələrinizi öyrənəndə hansı hissləri keçirdiniz?
– İmtahan adı hər zaman müəyyən qədər həyəcan doğurur, bu həm şagird, həm də müəllim üçün keçərlidir. Buna baxmayaraq, yüksək nəticə əldə edəcəyimə içimdə inam vardı. Çünki bilirəm ki, Allah zəhməti heç vaxt yerdə qoymur.
İmtahanın müəllimlərin peşəkar inkişafına real təsiri olduğunu düşünürsünüzmü?
– Bəli, bu imtahanın peşəkar inkişaf baxımından müsbət təsirini öz üzərimdə hiss etmişəm. İxtisasımla bağlı çoxlu yeni internet resursları və faydalı biliklər öyrəndim.
Bu imtahan müəllimlərin tədris keyfiyyətini necə artırır?
– Bu imtahan müəllimlərin tədris keyfiyyətinə müsbət təsir göstərir. Kurikulum metodunu yalnız nəzəri şəkildə deyil, praktikada da tətbiq etmək bacarığı formalaşdırır və tədrisdə effektivliyi artırır.
Söhbətləşdi: Elşən YƏHYAYEV
Xəbərdən istifadə edərkən istinad etmək vacibdir.
