Bu gün Əmək və Əhalinin Sosial Müdafiəsi Nazirliyinin növbəti əməkdaşı, nazirliyin şöbə müdiri işdən azad olunub. Xeberle.com portalına daxil olan məlumata görə, nazirliyin İctimaiyyətlə əlaqələr şöbəsinin müdiri İlham Məmmədov tutduğu vəzifəsindən azad olunub. Onun öz ərizəsiylə işdən çıxdığı bildirilir.

Məlumat üçün bildirək ki, İlham Məmmədov sumqayıtlıdır. Uzun müddət "Azadinform" İnformasiya Agentliyində sosial və iqtisadi sahələr üzrə müxbir, sonra isə elə həmin şöbənin müdiri kimi fəaliyyət göstərib. 1 iyun 2010-cu il tarixindən Əmək və Əhalinin Sosial Müdafiəsi Nazirliyinin Ümumi şöbəsində məsləhətçi, daha sonra isə İctimaiyyətlə əlaqələr şöbəsinin müdir müavini və müdiri vəzifələrində işləyib.
İ.Məmmədovun özüylə əlaqə saxladıq. O, öz ərizəsi ilə işdən azad olunması məsələsini təsdiqlədi və əlavə etdi ki, başqa bir dövlət qurumunda iş təklifləri alıb: “Hələlik təkliflərlə bağlı qərar verməmişəm. Təklifləri dəyərləndirmək üçün zaman lazımdır”.