Avstriya mətbuatı Çempionlar Liqasının III təsnifat mərhələsində "Zalsburq”un rəqibi olan Ağdamın "Qarabağ” klubuna geniş yer ayırıb. Sportnet.az-ın məlumatına görə, "weltfussball.at" saytında dərc olunan yazıda nəinki klub, hətta oyunun keçiriləcəyi Respublika stadionu və bu arenaya adı verilmiş məşhur azərbaycanlı hakim Tofiq Bəhrəmovdan bəhs edilib.
Xüsusən, "Qarabağ”ın ev oyunlarını məhz bu stadionda keçirilmə səbəbləri geniş təhlil olunub. Yazıda deyilir: "Çempionar Liqasının III təsnifat mərhələsində "Zalsburq”un qarşılaşacağı rəqib Azərbaycanın Ağdam rayonunun "Qarabağ” komandasıdır. Bu klub son ölkə çempionu olsa da, bəzi kədərli səbəblərdən ev oyununu öz doğma meydanında keçirə bilməyəcək. İlk oyun Azərbaycanın paytaxtı olan Bakının Tofiq Bəhrəmov adına Respublika stadionunda baş tutacaq”.
Daha sonra 23 iyul 1993-cü ildə Ağdamın Ermənistan tərəfindən necə işğala uğradığını və ölkənin Azərbaycanın bütövlüyü uğrunda gedən döyüşləri, həlak olan şəhidlər haqda yazılıb: "Hazırda Ağdam da daxil olmaqla, Qarabağın işğalı davam edir. Orada Ermənistan hakimiyyəti formalaşdırılıb”.
Hətta uzun illər Ağdam klubunun kapitanı olan, Azərbaycanın Milli Qəhrəmanı Allahverdi Bağırovun Qarabağda gedən qanlı döyüşlərdə şəhid olduğu da qeyd edilib.
Qeyd edək ki, iyulun 30-da keçiriləcək "Qarabağ” – "Zalsburq” matçı saat 20:30-da başlanacaq
Xəbərdən istifadə edərkən istinad etmək vacibdir.
