İsveçrənin "FRIKE GROUP” şirkətinin rəhbəri Andre Keller, Kosmetika və Yuyucu Vasitələr Cəmiyyətinin direktoru Berin Klötta Sumqayıt Şəhər İcra Hakimiyyətinin başçısı Zakir Fərəcovla görüşüblər. Görüşdə Azərbaycanın İsveçrədəki səfiri Əkrəm Zeynallı da iştirak edib.
Xeberle.com AZƏRTAC-a istinadən xəbər verir ki, qonaqlara Sumqayıt şəhəri haqqında ətraflı məlumat verilib. Bildirilib ki, Sumqayıt şəhərinin 67 yaşı var. Gənclik şəhəri olmasına baxmayaraq burada bir zamanlar iri kimya müəssisələri fəaliyyət göstərib. İstismar müddətini başa vuran bu müəssisələrin yerində hazırda yeni sənaye obyektləri inşa olunur. Bu da şəhərin iqtisadiyyatına güclü təkan verməklə yanaşı, həm də işsizlik problemini aradan qaldırır.
Qeyd olunub ki, hazırda Sumqayıt şəhərində iqtisadiyyatın müxtəlif sahələrində, o cümlədən kimya sənayesi sahəsində investisiya qoyulması üçün böyük potensial mövcuddur. Eyni zamanda, investorlar üçün cəlbedici güzəştlər vardır.
İsveçrənin iş adamları Azərbaycanla iqtisadi münasibətlərin daha da möhkəmləndirilməsinin vacibliyini, Sumqayıta yatırım qoymaqda maraqlı olduqlarını vurğulayıblar.
Sonra qonaqlar Sumqayıt Kimya Sənaye Parkında və "Azərikimya” İstehsalat Birliyində fəaliyyət qöstərən müəssisələrlə tanış olublar.

Xəbərdən istifadə edərkən istinad etmək vacibdir.