Aprel ayının əvvəllərində cəbhə xəttində gedən döyüşlərdə qəhrəmancasına şəhid olmuş əsgər Əbdülməcid Nadirşah oğlu Məcidov medalla təltif edilib.
Xeberle.com xəbər verir ki, bu barədə şəhidin ailəsinə Müdafiə Nazirliyinin Şəxsi Heyət Baş İdarəsi Kadrlar İdarəsinin Hərbi rütbələr və təltiflər şöbəsinin Hərbi təltiflər bölməsinin rəisi Əli Mehdiyevin imzası ilə məktub göndərilib. Məktubda bildirilir ki, Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissənin qarşısında qoyulmuş döyüş tapşırıqlarını yerinə yetirərkən şəhid olmuş əsgər Axundov Əbdülməcid Nadirşah oğlu Azərbaycan Respublikası Müdafiə nazirinin 19.04.2016-cı il tarixli müvafiq əmri ilə ölümündən sonra "Hərbi xidmətdə fərqlənməyə görə” 3-cü dərəcəli medalı ilə təltif olunub. Medal yaxın günlərdə şəhidin ailəsinə təqdim ediləcək.
Qeyd edək ki, Sumqayıt şəhər sakini olan Əbdülməcid Nadirşah oğlu Axundov 1993-cü il oktyabrın 15-də anadan olub. 1999-2010-cu illərdə Sumqayıt şəhər 16 saylı orta məktəbdə təhsil alıb. 2011-2015-ci illərdə Azərbaycan Texniki Universitetində ali təhsil alıb və "Elektrik mühəndisi” ixtisasına yiyələnib. Ali məktəbi bitirdikdən sonra həqiqi hərbi xidmətə yollanıb.
Ə.Məcidov Tərtər istiqamətində gedən döyüşlərdə qəhrəmancasına şəhid olub.
Allah rəhmət eləsin! 
Xeberle.com