Aprel ayının əvvəllərində cəbhə xəttində gedən döyüşlərdə qəhrəmancasına şəhid olmuş müddətdən artıq hərbi qulluqçu əslən Biləsuvar rayonundan olan Sumqayıt sakini 27 yaşlı Məmmədov Murad Vaqif oğlu ölümündən sonra Müdafiə naziri Zakir Həsənovun əmri ilə təltif edilib.
Murad Məmmədov Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissənin qarşısında qoyulmuş döyüş tapşırıqlarını yerinə yetirərkən şəhid olduğuna görə "Hərbi xidmətdə fərqlənməyə görə” 3-cü dərəcəli medalınalayiq görülüb.
Şəhid Murad Məmmədov ağır döyüşlərdə şücaətlə mərdlik nümayiş etdirib. Arzusu isə hər bir vətənini sevən azərbaycanlı kimi Qarabağda bayrağımızı dalğalandırmaq idi.
Şəhid Murad Məmmədovun təltif edildiyi medal bu gün Sumqayıtın Hacı Zeynalabdin qəsəbəsində yaşayan ailəsinə təqdim olunub.
Mərasimdə Sumqayıt şəhər icra hakimiyyətinin, Müdafiə Nazirliyinin və ictimaiyyətin nümayəndələri iştirak ediblər. Bildirilib ki, o, hər zaman igidliyi və cəsurluğu ilə seçilib. Bu il aprel ayının əvvəllərində təmas xəttində erməni təxribatının qarşısını alarkən 27 yaşında şəhidlik zirvəsinə ucalıb.
Tədbirdə o da bildirilib ki, Azərbaycan Silahlı Qüvvələri şəhidlərin qisasını alacaq.
M. Məmmədovun ölümündən sonra təltif edildiyi "Hərbi xidmətdə fərqlənməyə görə” 3-cü dərəcəli medalı şəhidin atasına təqdim edilib.
Xeberle.com