Mütəmadi olaraq Sumqayıt sakinləri, oxucularımız elektron poçt ünvanımıza müxtəlif fotolar göndərir. Novruz Əliyev adlı şəhər sakini Çerkassı küçəsi, qəbristanlıq yoluna keçid ərazidə 2 gün öncə - 20.12.2016 tarixində çəkdiyi fotonu təqdim edib. Gördüyünüz kimi, yolun düz ortasında kanalizasiya lükünün qapağı yoxdur və kimsə ora ağac salıb - güman ki, sürücüləri ehtiyatlı sürməyə xəbərdar etmək məqsədilə. Əldə etdiyimiz məlumata görə, yolun ortasındakı bu "boşluq" təzə deyil və bir müddətdir ki, həmin küçə ilə hərəkət edən sürücüləri narahat edir. Deyilənə görə, yolun bu hissəsində bir neçə avtoqəza da olub. İndi sual yaranır, MİS işçiləri, yol polisi və nəqliyyat departamenti əməkdaşları hara baxır?! Bu yoldan onlar da istifadə etsələr belə, görünür, buraya nəzarət edən yoxdur. Belə çıxır ki, bu mənzərəni görən aidiyyəti orqan əməkdaşlarına bu durum xoşdur. Yəni, bu qədər laqeydləşdikmi?!
Bəziləri deyə bilər ki, neyləyək, qoyuruq, oğurlayırlar.
Bəs sürücülər nə etməlidirlər, oğurlanırsa, deməli, həyatlarını təhlükəyə atmalı, onda qəza törətməlidirlər?!
Oğurlanır, yenə qoyulmalıdır, oğurlanır, nəzarət edilməlidir, kamera quraşdırılmalıdır və sair və ilaxır. Amma yolun belə gülünc formada olması, kimsəyə haqq vermir bunu normal qəbul eləməyə...
Elnur Ağayev
Xeberle.com
P.S. Bu fotonu 1 gün öncə sosial şəbəkələrdə paylaşmışdıq. İstifadəçilərdən biri belə yazıb: "Hər gün o yoldan keçəndə bilirəm ki, orda ağac bitir deyə asta sürürəm"
P.S.S. Əslində Çerkassı küçəsindəki bu avtomobil yolu yaxşı vəziyyətdədir. O dəlikdən başqa daha 2 problem həll olunmalıdır. Sözügedən yolun Sülh küçəsinə çıxış hissəsi yaxşı vəziyyətdə deyil, yaxşı olar ki, tezliklə düzəldilsin. Bir də yolun Dəmiryol vağzalına gedən hissəsi dağılıb, bu hissəyə də "əncam çəkilməlidir".
Xəbərdən istifadə edərkən istinad etmək vacibdir.
