“Mənim sübyektiv fikrimə əsasən, dövlət başçısı İlham Əliyev Soçidə Ermənistan prezidenti ilə görüşə getməsə, daha düzgün addım atmış olar”.

Axar.az xəbər verir ki, bu açıqlama ilə hərbi ekspert Üzeyir Cəfərov öz Feysbuk səhifəsində çıxış edib.

O, 20 ildən çox davam edən münaqişənin çoxlarına sərf etdiyini bildirib:

“Qoşunların təmas xəttində qısamüddətli "müharibə" bitdi və gözlər indi Rusiyaya dikilib. Hamı Azərbaycanın dövlət başçısı ilə Ermənistan respublikasının cinayətkar statusunda olan dəstə başçısı Serj Sərkisyanın Soçi şəhərində keçirilməsi nəzərdə tutulan görüşünü gözləyir. Və mənim əziz soydaşlarım da ümidlə gözləyirlər ki, Qarabağ faciəsinin memarı və müəlliflərindən biri olan dövlətin başçısı Putin müəllim bizim halımıza yanacaq. Bəlkə də mənim fikrilərimlə razılaşmayanlar olacaq, amma hesab edirəm ki, biz özümüz özümüzü çox aldatmışıq və hələ də hansısa nağıllara inanmağa davam edirik. Əslində, bu 20 ildən çox keçən müddətdə biz çoxdan anlamalıydıq ki, bu münaqişə çoxlarına sərf edir və bu faciədən kifayət qədər bəhrələnən ölkələr, onların qeyri-səmimi rəhbərləri var. Həmçinin nə qədər ağır da olsa, etiraf etməliyik ki, Qarabağ savaşı ilə bağlı elə Azərbaycanda da bəzi psevdopatriot qüvvələr mövcuddur. Onlar çox böyük ustalıqla bu illər ərzində həm nala-mıxa vurmağı öyrəniblər, həm də indiki status-kvo ürəklərincədir. Bəli-bəli, təəccüblənən yoldaşlara üzümü tutub deyirəm. Son 3-4 gündə cəbhə bölgəsində baş verən hadisələrin qısa təhlilini aparanda, qarşımıza çıxan acınacaqlı mənzərələrdən biri də məhz yuxarıda söylədiyim bu faktordur. Bir çoxları üzdə Qarabağın geri alınmasını istədiklərini bildirsələr də, əslində, faktiki olaraq Rusiya dövlətinin Ermənistana işğalçılıq siyasətini həyata keçirtməkdə dəstək dolu addımlarına bir növ haqq qazandırırlar”.

Hərbi ekspert Putinin təşkil etdiyi bu görüşü növbətçi görüş adlandərəb:

“Yenə Soçidə özünü Ukrayna məsələsində bir daha bütün dünyaya son dərəcə qeyri-səmimi bir imicdə təsdiqləyən Putinin, onun "şagirdi" olmaq istəyən Sərkisyanın hiyləgər və çoxmənalı sözlərinə qulaq assaq, biz növbəti dəfə geriyə addım atmış olarıq. Əslində, belə mənasız və perspektivsiz görüşlərdən çox görmüşük. Məni ən çox narahat edən məqamlardan biri odur ki, bu görüşdən də sonra yenə Qarabağ məsələsində bircə addım da irəliləyiş olmayacaq və biz növbəti itkilərimizi yaşamalı olacağıq. Atəşkəs dövründən bu yana ən böyük itkiləri verən Azərbaycana bu adamlar zərrə qədər də olsun insani nöqteyi-nəzərdən yanaşma göstərmədilər. ATƏT-in Minsk Qrupunun bivec həmsədrləri özlərində cəsarət və kişilik tapıb, vaxtsız dünyasını dəyişənlərin ailələrinə və yaxınlarına Allahın quruca sözüylə də olsa rəhmət belə diləmədilər. Bütün bunlardan sonra, biz onlardan hansı ədalətli mövqeni gözləyə və ya görə bilərik?”

Üzeyir Cəfərov son günlər Azərbaycan üçün yaranmış gözəl imkandan yararlanmadığına görə təəssüfləndiyini deyib:

“Fürsət demişkən, son olaylarda biz çox unukal və bəlkə də bundan sonra heç vaxt ələ düşməyəcək bir şansı bada verdik. Mən yaşadığımız ağır itkilərdən dolayı bütün gücümüzü səfərbər edərək torpaqlarımızı düşmən caynağından azad etməyi nəzərdə tuturam. Biz gərək Ermənistana, onun şəksiz havadar(lar)ına kim olduğumuzu göstərərdik. Mən onu da hiss edirəm ki, bu fikirlərimi oxuyan bəzi dostlar ağız büzəcəklər ki, diletantlıq edirəm, kiminlə üz-üzə qaldığımızı unuduram. Şəxsən bu məsələdə mənim mövqeyim tam əksinədir. Rusiyanın indi çox çətin bir dövr yaşadığını, dünyanın onun üzərinə Ukrayna ilə bağlı yürütdüyü yanlış siyasətə görə necə sürətlə gəldiyini, şimal qonşularımızın hazırda olmazın əsəb gərginliyi keçirdiyini mütləq diqqətdən qaçırmamalıydıq. Min dəfə təəssüflənirəm ki, biz bu imkandan da yararlanmadıq. Niyə və nə üçün suallarını yəqin ki, tarix və tarixçilər nə vaxtsa incələyərlər. Sonda bir məsələni də qeyd edim ki, qoşunların təmas xəttində duran şəxsi heyətimiz bu günlərdə sayıqlığı birə beş artırmalıdırlar. Adəti üzrə, belə görüşlər ərəfəsi və sonra çox ciddi gərginliklər yaşanır”.