Hər il olduğu kimi, bu il də Ramazan ayının başlaması bazarda qiymət artımlarına stimul verib. APA TV-nin xəbərinə görə, bayram menyusuna daxil olan əsas ərzaq məhsullarının demək olar ki, hamısında bahalaşma müşahidə edilməkdədir.
 
İftarı xurma ilə açmaq lazım olduğundan, əvvəlcə Ramazan ayının əvəzolunmaz təamının qiyməti ilə maraqlandıq. Bakı bazarlarında İran, Tunis, Mədinə, İsrail və digər yerlərdən gətirilmiş xurmalar almaq olar. Qiymətlər isə fərqlidir - 4 manatdan 15 manata kimi.
 
Satıcı: "Ən çox tələbat İran və İsrail xurmalarınadır ki, bunların da qiyməti 4-17 manat arasında dəyişir. Daha çox üstünlük verilən "Mədinə" xurmasının bir kiloqramı 11 manat,  İsrail xurmasının kiloqramı 12 manat 50 qəpikdən 16 manatadəkdir. Qablaşdırılmış xurmalara da tələbat artıb, qiymətlər 3 manatdır".
 
Tunis xurmasının kiloqramı 9 manat 90 qəpiyə, digər xurmalar isə 6 manat 90 qəpiyə, 7 manat 50 qəpiyə, 10 manata, 14 manat 50 qəpiyə satılır. Qutuda olan İran xurmaları isə  2 manat 79 qəpiyə, 4 manata satılırdı.
 
Ümumiyyətlə, iftar menyusuna daxil olan əsas ərzaq məhsullarının, demək olar ki, hamısında bahalaşma müşahidə edilməkdədir. Düyünün kiloqramı 2 manat 50 qəpikdir. Ləpənin, eyni zamanda meyvə və tərəvəzlərin qiymətində müəyyən qədər artım vardı. Satıcılar isə qiymət artımını tələbatın artması ilə izah edirlər: "Bu gün eyni zamanda çərəzlərə də tələbat artıb. Alıcılar daha çox qoz ləpəsi, badam, qaysı və kişmiş alırlar. Badamın kiloqramı 16 manat, qaysıların qiyməti 8-12 manat arasında dəyişir. Qoz ləpəsi də 8-12 manat arasında dəyişir".
 
Quru meyvələrin qiyməti 5 manatdan 9 manata qədərdir. Satıcılar deyir ki, ötən illə müqayisədə qiymət artımı olduğundan, bu gün bazarda alıcı qıtlığı yaşanır: "Ötən illə müqayisədə Ramazan süfrəsi üçün nəzərdə tutulan təamların qiyməti, xurma da daxil olmaqla, 1-2 manat arasında dəyişib. Ona görə də bu əvvəlki kimi alıcı bolluğu yoxdur".
 
Bazarda ağartı məhsullarının qiyməti ilə də maraqlandıq. Məlum oldu ki, pendirlərin qiyməti növünə görə dəyişir. Keçi pendiri 8 manat, qoyun pendiri 5 manat, mal pendiri 6 manat, südün 1 litri 1 manat, kənd yumurtasının qiyməti isə 20 qəpikdir.
 
Kartofun qiyməti 40 qəpiklə 1 manat arasında dəyişir. Soğanı isə 3 kilosu 1 manata da tapmaq olar. Xiyarın ən ucuzu kənar bazarlarda 35-40 qəpiyə olsa da, ümumilikdə 1,5 manata qədər təklif edilir. Bibərin 5 ədədi 1 manatdır. Pomidorun qiyməti isə 1,5 manatdan aşağı düşmür. Lobya 40 qəpikdən başlayır, badımcan 40-50 qəpik arası satılır. O ki qaldı yayın meyvə və tərəvəzlərinə, yaylıq alma 1-2 manat arasında dəyişir. Quba şaftalısı 1.50, Lənkəran şaftalısı isə 3 manata satılır. Alça və ərik 3 manat, gilas növündən asılı olaraq 3 manatdan başlayır, gilənar 2 manata satılır.
 
"Öküz ürəyi” adlandırılan gilası isə 5 manata tapa bilərsən. Artıq yetişməsinə baxmayaraq, ərik də bazarlarda 5 manatadır. Alça kiloqramı 1-3 manata, qara və ağ tut isə qablaşdırılmış formada 2-3 manata bazara çıxarılıb.
 
Çiyələk isə yağışdan sonra yoxa çıxsa da, indi vitrinlərdə görünməyə başlayıb. Qiyməti isə 2,5-2,8 manatdan başlayır. Qarağatın iki növünün qiyməti 3 manat, qarğıdalının ədədi 60 qəpik, Sabirabad qarpızının kiloqramı 1 manat təşkil edir. Göyərtinin 6 ədədi bir manatadır.
 
Ət və ət məhsullarına gəlincə, quzu əti 9 manata, mal əti 7.50 manata satılır. Kənd toyuqlarının qiyməti isə 4.50-5 manat arasında dəyişir.
 
Fürsətdən istifadə edib alıcıların da fikrini öyrəndik.
 
Alıcı: "Digər bazarlarla müqayisədə burda qiymətlər normaldır. Məsələn, mən qoz ləpəsi aldım 9 manata, amma 15 manata da var. Yəni hər kəs cibinə uyğun olanını seçir. Fikrimcə, baha deyil. İstədiyimi ala bildim".
 
Alıcı: "Qiymətlər bahadır. Bazara girəndən yerli yay meyvələri ilə maraqlanıram. 7 manata 1 kiloqram gilanar və gülas ala bilmişəm. Yerli məhsullarının qiyməti çox bahadır. Bunlar ki, xaricdən gətirilmir? Daha ucuz olsa, hamı ala bilər".
 

Xəbərdən istifadə edərkən istinad etmək vacibdir.