Azərbaycan Respublikası Prezidenti  yanında Qeyri-Hökümət  Təşkilatlarına Dövlət Dəstəyi Şurası maliyyə yardımı ilə "Qadın Təşəbbüsü və Sosial Problemlərin Həllinə Yardım” İB-nin icra etdiyi "Insan alverinin potensial qurbanlarının maarifləndirilməsi və onlara   sosial xidmətlərin təşkili, insan alverinin qurbanlarının sosial reablitasıyasına yardım göstərilməsi” layihəsi çərçivəsində Sumqayıt şəhəri 3 saylı orta məktəbdə "İnsan alverinə qarşı mübarizə haqqında məlumatlandırma” mövzusunda ictimai müzakirə keçirilib. İctimai müzakirədə 56 nəfər olmaqla müəllimlər,məktəb psixoloqları və digər təhsil işçiləri iştirak ediblər.
Müzakirəni giriş sözü ilə məktəbin direktoru Tirmə Qurbanova açaraq iştirakçıları və təşkilat nümayəndələrini salamlayıb, rəhbərlik etdiyi məktəbin artıq bir neçə ildir ki, insan alveri ilə mübarizə sahəsində Beynəlxalq Miqrasiya Təşkilatı və Qadın Təşəbbüsü və Sosial Probelmlərin Həllinə Yardım İB-ilə əməkdaşlıq etdiyini vurğulayıb.
 Sonra təşkilatın rəhbəri Zenfira Mustafayeva icra olunan layihə barədə məlumat verib və insan alveri ilə mübarizə mövzusunda geniş çıxış edib. Zenfira Mustafayeva həmçinin qaynar xətt barədə də məlumat verib və təşkilatda mütəmadi olaraq insan alveri qurbanlarına və potensial qurbanlara müxtəlif  (psixoloji,hüquqi,sosial,tibbi) yardımların göstərildiyini bildirib.
O, çıxışı zamanı qeyd edib ki, insan alveri ilə mübarizə mövzusunda təlimlər və görüşlər məktəblərdə mütəmadi və davamlı olaraq təşkil olunacaq: "İştirakçılar əsasən yuxarı sinif şagirdləri və təhsil işçiləri olacaq. Çünki, təhsili başa vurmuş gənclər ali məktəblərə daxil ola bilmədikdə, müəyyən firma və şirkətlərə üz tuturlar və bu da sonda çox vaxt onların aldanmasına və qurbana çevrilməsinə səbəb ola bilər. Bu sahədə müəllim və psixoloqların  maariflənməsi məktəblərdə təhsil alan yuxarı sinif şagirdlərinin də bu mövzuda maariflənməsinə birbaşa təsir edəcəkdir.”
İctimai müzakirə iştirakçıları bu mövzuda öz fikirləri və düşüncələri ilə bölüşüblər.
Müzakirənin sonunda iştirakçılara mövzuya uyğun olaraq materiallar, buklet və broşuralar paylanıb, filmlər nümayiş olunub.

 

 

 

 

Xəbərdən istifadə edərkən istinad etmək vacibdir.