Xəbər verdiyimiz kimi, Sumqayıtın ən böyük klinikalarından biri “Liman” Səhiyyə Nazirliyindən lisenziya ala bilmədiyi üçün fəaliyyətini dayandırıb. 

Doğrudur, klinikanın özündən bu məsələni şərh edərkən “Liman”ın müvəqqəti olaraq təmirə dayandığını bildiriblər, ancaq Səhiyyə Nazirliyinin saytında klinikanın lisenziyasının vaxtının bitdiyi əks olunur. 

Amma məsələnin ikibaşlılığı bununla da bitmir. Bir müddət öncə klinikanın gizli fəaliyyət göstərməsi barədə mediaya məlumatlar sızmışdı və klinikanın tibbi direktoru Emin Hacızadə bu faktı qətiyyətlə təkzib edərək, binada tamamilə təmir getdiyini, əməliyyatxananın əməliyyat üçün yararlı olmadığını dilə gətirmişdi.

Ancaq bu həftə redaksiyamıza göndərilən məktub-sənəd daha ciddi əhəmiyyət kəsb edir. Belə ki, elektron poçtumuza gələn məktubda klinikada gizli şəkildə əməliyyatların aparıldığı deyilir və xəstələrin adlarının və klinikaya ödədikləri vəsaitin miqdarı əks olunur. Pasiyentlərin şəxsi həyat sirri prinsipi nəzərə alınaraq, biz onların yalnız soyadlarını və əməliyyatlara görə ödənilmiş pulun məbləğini dərc edəcəyik. Məktubda əməliyyatların 15.07.2014-cü il tarixində A.Verdiyev tərəfindən edildiyi göstərilir.

Hüseynov – 350 AZN

İbrahimov – 800 AZN

Bağırov – 270 AZN

Bağışov – 270 AZN

Kərəmli – 250 AZN

Əhmədov – Məbləğ göstərilməyib

Göründüyü kimi, əgər bizə göndərilən sənəd həqiqəti əks etdirirsə, bu, o deməkdir ki, lisenziyası uzadılmayan klinika dövlətin gözündən yayınıb, gizli fəaliyyətə keçib. Faktı dəqiqləşdirmək üçün klinikaya çoxsaylı zənglərimizə isə təəssüf ki, cavab verən olmadı.

Hər halda, biz digər maraqlı tərəflərin də mövqeyini işıqlandırmağa hazırıq.

(168saat.com)