Bu gün dünyada Azərbaycan və Türkiyə dövlətləri kimi, etnik, mədəni, dil və din baxımından yaxın ikinci bir ölkələr yoxdur. Aydın məsələdir ki, bu yaxınlıq və münasibətlərin daha da davamlı olması baxımından hər 2 qardaş ölkədə səfirlik və konsulluqların da böyük əhəmiyyəti var.
Bu baxımdan fəaliyyət göstərən dərnəklərin də rolu danılmazdır. İzmir Türkiyənin ən böyük şəhərlərindən biridir. Bu çoxmillətli, sənaye və turizmi yüksək səviyyədə inkişaf edən bir şəhərdə Azərbaycan dərnəklərinin fəallığı 2 ölkə arasında mədəni, siyasi, ictimai əlaqələrin daha da inkişaf etdirilməsi baxımından xüsusi önəm daşıyır. Belə dərnəklərdən biri bu şəhərdəki Azərbaycan Kültür və Dayanışma Dərnəyidir. Bir neçə ildir ki, fəaliyyət göstərən bu dərnək böyük ölçüdə həm Azərbaycan ziyalıları, həm də İzmir ictimaiyyəti arasında nüfuz qazanıb. Bu müddətdə bir sıra nailiyyətlərə imza atan dərnəyin ən böyük uğurlarından biri cari ilin fevralında İzmir şəhərinin Bornova rayonunda Azərbaycan Dostluq Parkının yaradılması və bu parkda Xocalı soyqırımı abidəsinin ucaldılması olub.
Elə İzmirdə olarkən ilk getdiyimiz yer də bura oldu. Belə ki, bizi çox böyük sevinc və hörmətlə qarşılayan dərnək rəhbəri Mülazim Paşa ilk gedəcəyimiz yerin məhz Xocalı abidəsinin olduğunu söylədi. Birlikdə Azərbaycan Dostluq Parkına baş çəkdik. Mülazim bəy söylədi ki, çətinliklərə baxmayaraq biz park üçün yer aldıq və burada Xocalı abidəsini ucaltdıq. Abidə üzərində 3 dildə - Azərbaycan, Türk və İngilis dilində məlumatlar yazdırdıq. Əslində, bu işi görmək bizim ən azından mənəvi borcumuzdur. Çalışdıq ki, Xocalıda ermənilər tərəfindən qətlə yetirilmiş həmvətənlərimizin ruhu qarşısında borcumuzdan çıxaq. Mülazim bəy Bornova bələdiyyəsi ilə birlikdə həyata keçirilən layihə haqqında geniş söhbət açdı. Fevralın 26-da keçirilən açılış mərasimində Azərbaycan və Türkiyə deputatlarının, diplomatların, Bornova sakinlərinin, QHT və KİV təmsilçilərinin iştirak etdiyini söylədi. Bu böyük hadisənin Türkiyə və Azərbaycan medialarında işıqlandırılmasından razılığını bildirdi. Daha sonra bizim orda olmağımız şərəfinə ziyafət təşkil olundu, masa arxasında da doğma vətənimiz Azərbaycan haqqında maraqlı söhbətlərimizi davam etdirdik. Mülazim Paşa bildirdi ki, gördüyümüz işləri davam etdirmək, iki ölkə arasında əlaqələrin daha da artırılması üçün hər gün daha səylə çalışırıq. Bu yöndə Azərbaycan ziyalılarının, ictimaiyyətinin, media və KİV təmsilçilərinin də dəstəyinə böyük ehtiyacımız var. Dərnək rəhbəri ilə söhbətimiz zamanı onu da öyrəndik ki, sən demə 74 yaşının olmasına baxmayaraq təhsildən hələ də uzaqlaşmayıb və hazırda Anadolu Universitetinin Əmlak komisyonu fakültəsinin tələbəsidir.
Dərnəyin sədr müavini Əşrəf Tuna da öz növbəsində bizi xoş sözlərlə salamlayaraq dərnəyin fəaliyyətindən, burada təşkil olunan tədbirlərdən söz açdı. O söylədi ki, Azərbaycan Kültür və Dayanışma Dərnəyi daim İzmirdəki Azərbaycan əsilli soydaşlarımızla əlaqə saxlayır, onları ictimai-mədəni tədbirlərə dəvət edirlər. Dərnək təmsilçiləri Azərbaycan və Türk dünyası ilə bağlı bütün mümkün layihə və təkliflərə açıq olduqlarını çatdırdılar.
Daha sonra sözügedən dərnəyin ofisinə baş çəkdik. Burada milli atributlardan,vətənimizi xatırladan məqamlardan ibarət xüsusi guşə yaradılıb. Mülazim bəy fikrinə davam edərək Azərbaycandan gələn qonaqların ilk öncə bu dərnəyə baş çəkmələrini arzuldağını bildirdi. Görüşümüzün sonunda xatirə fotoları çəkdirdik.
Sevindirici haldır ki, İzmir kimi böyük bir şəhərdə belə vətənpərvər soydaşlarımız fəaliyyət göstərir. Heç kimə sirr deyil ki, İzmirdə Azərbaycan Dostluq Parkı və parkda Xocalı soyqırımı abidəsinin açılması Azərbaycan-Türkiyə əbədi qardaşlığına daha bir nümunədir.
Elnur Ağayev və Kamal Almuradlı
Xeberle.com
Xəbərdən istifadə edərkən istinad etmək vacibdir.
