Azərbaycan Mətbuat Şurası 2016-cı il üçün Ali Media Mükafatı laureatlarının adlarını açıqlayıb.
Xeberle.com xəbər verir ki, mükafatçılar arasında sumqayıtlı jurnalist-publisist Aida Eyvazova da var.
Xatırladaq ki, hər il 22 iyul Milli Mətbuat Günündə təqdim olunan mükafatın 3 dərəcəsi var. Birinci dərəcə üzrə 1, ikinci dərəcə üzrə 2, üçüncü dərəcə üzrə 5 laureat müəyyənləşdirilib.
Ali Media Mükafatının 3-cü dərəcəsi üzrə laureatların hər birinə 1000, 2-ci dərəcəsi üzrə 2000 manat pul təqdim edilir. 1-ci dərəcə üzrə laureat isə 5000 manat pulla mükafatlandırılır.
Ali Media Mükafatının 3-cü dərəcəsi üzrə – Media sahəsindəki uzunmüddətli səmərəli fəaliyyətlərinə görə təltif edilibər:
Seyfəddin Hüseynli, "525-ci qəzet”in baş redaktor müavini;
Azər Ayxan, "Yeni Müsavat” qəzetinin baş redaktor müavini;
Aida Eyvazova, jurnalist-publisist;
Rəfiqə Sadıqova, "Gəncənin səsi” qəzetinin baş redaktoru;
Rəşid Hüseynov, jurnalist-publisist.
Ali Media Mükafatının 2-ci dərəcəsi üzrə laureatlar:
Umud Rəhimoğlu, Beynəlxalq Avrasiya Mətbuat Fondunun rəhbəri – Azərbaycan həqiqətlərinin təbliğindəki xidmətlərinə görə təltif edilib;
Müsəllim Həsənov, Bakı Media Mərkəzinin redaktoru – Media sahəsindəki uzunmüddətli səmərəli fəaliyyətinə görə təltif edilib.
Ali Media Mükafatının 1-ci dərəcəsi üzrə laureat – qalib:
Sona Vəliyeva, yazıçı-publisist, filologiya üzrə fəlsəfə doktoru – Azərbaycan milli mətbuatının banisi Həsən bəy Zərdabinin yaradıcılığından bəhs edən "İşığa gedən yol” romanına görə təltif edilib.
Qeyd edək ki, Sona xanım Vəliyeva Prezident Administrasiyası İctimai-siyasi məsələlər şöbəsinin müdiri Əli Həsənovun həyat yoldaşıdır.
Laureatlara mükafatlar bu gün – 22 iyul 2016-cı il tarixdə milli mətbuatımızın 141 illiyi ilə bağlı "Altun saray” restoranında keçiriləcək təntənəli mərasimdə təqdim olunacaq.
Xəbərdən istifadə edərkən istinad etmək vacibdir.
