Ötən gün gözlənilməz qərarla hərbi qüvvələrin Suriyadan çıxarılması haqda qərar verən Rusiya artıq hərbi birləşmələrini bu ölkədən çıxarmaq üçün hazırlıqlara başlayıb. 

ANS PRESS-in "TASS"a istinadla verdiyi məlumata görə, Suriyadakı Rusiyaya məxsus Hmeymim aviabazasının personalı avadanlıqları, maddi-texniki vasitələri, əmlakı hərbi nəqliyyat təyyarələrinə yükləyir. "Aviabazanın texniki personalı təyyarələrin Rusiya Federasiyası aerodromlarına göndərilməsi üçün hazırlıqlar görür. Şəxsi heyət avadanlıqları, əmlakı və maddi-texniki vasitələri nəqliyyat aviasiyasına yüklənməyə başlayıb”, - deyə Rusiya Müdafiə Nazirliyinin açıqlamasında bildirilir.

5 min km-dən uzaq olan uzun məsafəli uçuşlarda Rusiya təyyarələri yanacaq doldurmaq və texniki baxış üçün eniş edəcəklər.  Təyyarələri hərbi nəqliiyat aviasiyası müşayiət edəcək. 

Rusiya prezidenti Vladimir Putin martın 15-dən Rusiya hərbi qüvvələrinin Suriyadan çıxarılması barədə əmr verib.  Fransa, Böyük Britaniya, Almaniya və İtaliya liderləri Putinlə telefonda Suriyada vəziyyətdən danışıblar. 

"Hesab edirəm ki, Müdafiə Nazirliyi qarşısına qoyulmuş tapşırıqları bütovlükdə yerinə yetirib. Buna görə sabahdan etibarən Suriya Ərəb Respublikasından bizim hərbi birləşmələrimizn əsas hissəsinin çıxarılmasına başlamağı əmr edirəm", - deyə Putin bildirib.

Rusiya ötən il sentyabrın 30-dan etibarən Suriya ərazisini bombalayır.  "Su-24M", "Su-30SM", "Su-25" və "Su-34" daxil olmaqla aviaqrup tərkibində 50 təyyarə və helikopter var.

Rusiya Suriya ərazisində terrorçulara qarşı sentyabrın 30-dan başlatdığı əməliyyatlarda "Hmeymim" hərbi bazasından minlərlə hərbi uçuş edilib və terrorçuların 1500 dən çox obyekti dağıdılıb. Rusiya Suriyaya S-300 raket kompleksi də göndərib. 

Hətta ötən ilin noyabr ayında hava sərhəddini pozduğu üçün rus təyyarəsinin Türkiyə tərəfindən vurulmasından sonra Rusiyanın göndərdiyi S-400 raket kompleksi Suriyaya çatıb. Suriya səmasını Türkiyə və NATO-ya qapatmağı planlaşdıran Rusiyanın S-400-lərindən ilk görüntülərini də yaymışdı.