Sumqayıtda özəl mənzilllərə bələdiyyə tərəfindən əmlak vergisi bildirişləri verilir. Bu isə vətəndaşları çaş-baş salıb. Sumqayıt şəhər 29-cu məhəllə sakini Zəminə Cəfərovaya da belə bir bildiriş gəlib. Z. Cəfərova indiyədək belə halla rastlaşmadıqlarını deyir və bildirir ki, Mənzil İstismar Sahəsinə illik 9 manat ev pulu verib:

 

"Mən illik ev pulunu ödəmişəm. Evimiz özəllləşib. Bina da ki, köhnə Xruşovka binadır. İndi də bələdiyyədən bildiriş gəlib ki, 9 manat ev pulu ödəməliyəm.Mən də deyirəm ki onlara mən illik ödəmişəm o necə olacaq? Deyirlər ki, o getdi. 9 manat ödəməliyəm. Demək zibil pulu ilə bir yerdə 15 manat ödəmişəm. Bələdiyyə də deyir ki, 6 manat zibil pulunu MİS-ə 9 manatı da bizə. Belə cıxır ki 1 ildə iki dəfə ev pulu ödəməliyəm.”

 

Məsələ ilə bağlı Sumqayıt şəhər Bələdiyyəsinin Mətbuat katibi Vüsal Məmmədov Xeberle.com-a bildirdi ki, Milli Məclis 2014-cü ilin iyununda «Yerli (bələdiyyə) vergilər və ödənişlər haqqında» qanuna dəyişiklik edib. 2015-ci ilin yanvarın 1-dən yeni qanunun tətbiqinə başlanıb:”Bundan öncə mülkiyyətçilər əmlakın ümumi dəyərindən 5 min manat çıxıb, yerdə qalan vəsaitin 0,1 faizi qədər vergi ödəyirdi.Bundan sonra ödəniş mülkün ümumi sahəsinə görə aparılacaq. Ümumi sahədən 30 kvadrat metr çıxıb yerdə qalan sahənin hər kvadrat metrinə görə vergi ödənilməlidir. Başqa sözlə, qüvvədə olan qanunvericiliyə görə, əmlakın dəyəri 5 min manatdan azdırsa, vergi tutulmur. Dəyər bu məbləği keçərsə, vergi binanın dəyərinin 0,1 faizini təşkil edir. Fiziki şəxslərin xüsusi mülkiyyətində olan binalara görə əmlak vergisi onların yerləşdiyi ərazinin bələdiyyəsi tərəfindən hesablanır.”

İndiyədək bu verginin hansı səbəbdən yığılmamaması məsələsinə gəldikdə isə mətbuat katibi bununla bağlı sualımıza belə cavab verdi: "Təəssüf ki, bununla məşğul olan olmayıb."
O ki, qaldı əmlak vergisinin məbləğinə, 30 kvadratmetrədək sahəsi olan mənzillərə bu vergi şamil olunmur. Bu sahədən çox olan mənzil sahibləri ildə bir dəfə olmaqla hər kvadratmetr üçün Sumqayıtda 30 qəpik ödəməlidirlər.

Ekspertlərsə ümumiyyətlə əmlak vergisi ilə paralel ev pulu yığılmasını düzgün saymır. Hesab edirlər ki, özəlləşdirilmiş mənzil sahiblərinin "kvartplata” ödəməsi özü də düzgün deyil: "Çünki bu mənim özəl mülkiyyətimdirsə, buna görə əmlak vergisi ödəyirəmsə, nəyə görə əlavə olaraq hər hansı ödəniş etməliyəm? Bələdiyyələr də qanuna müvafiq olaraq əmlak vergisinin onlara ödənməli olduğunu deyir, lakin əhali arasında olan çaşqınlıq onların da işinə mane olur”.
Əksər xarici ölkələrin təcrübəsində bələdiyyələr daha geniş funksiya və səlahiyyətlərə sahibdir. Ekspert Qubad İbadoğlunun fikrincə, artıq Mənzil İstismar Sahələri ləğv edilməli və yerini bələdiyyələrə verməlidir: "Bir orqana getmək, arayış götürmək və arayış almaq üçün müəyyən ödənişlər həyata keçirmək və son nəticədə də bu, vətəndaşların həm xərclərini artırır, həm əlavə vaxt itkisidir və əlavə bürokratik əngəllərdir. Bu baxımdan bu gün MİS-in bir arayış verməkdən başqa funksiyası qalmayıb”