Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Türk Dünyası İnfo” ictimai birliyinin "Müstəqilliyin 25 ili: Azərbaycançılıq ideyası və milli-mənəvi inkişaf mövzusunda araşdırmalar və tədbirlər” adlı layihəsi əsasında "Müstəqilliyin 25 ili: Azərbaycançılıq ideyası və dil siyasəti” adlı kitabın bölgələrdə təqdimatı və görüş - müzakirələr davam edir.
Kitab bu dəfə Sumqayıt şəhərində ictimaiyyətin nümayəndələrinə təqdim olunub.
Sumqayıtın Tarixi Muzeyində keçirilən tədbiri Sumqayıt Şəhər İcra Hakimiyyətinin əməkdaşı Fərman Kazımov açaraq "Müstəqilliyin 25 ili: Azərbaycançılıq ideyası və milli-mənəvi inkişaf mövzusunda araşdırmalar və tədbirlər” adlı layihə əsasında "Müstəqilliyin 25 ili: Azərbaycançılıq ideyası və dil siyasəti” adlı kitabın da toplanmış materialların mədəni elmi-dairələr üçün mühüm bir vəsait olduğunu vurğulayıb.
"Türk Dünyası İnfo” İctimai Birliyinin sədri Dəyanət Osmanlı belə bir layihənin gerçəkləşməsinə dəstək göstərən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasına təşəkkür edərək azərbaycançılıq ideologiyasının xalqımızın milli-mənəvi inkişafında, dilimizin qorunmasında, təkmilləşdirilməsində, dünya dilləri arasında nüfuzunu daha da möhkəmləndirməsində böyük rolundan bəhs edib. Nəşrin elmi-mədəni sahələrdə çalışanlar, habelə yazarlar və yaradıcı gənclər üçün azərbaycançılıq ideyasının və dövlətimizin ana dilinin inkişafına qayğısı məsələlərinin öyrənilməsi, o cümlədən milli-mənəvi dəyərlərimizin təbliği istiqamətində mühüm toplu olduğunu diqqətə çəkib.
Daha sonra kitabın redaktorları Əkbər Qoşalı, İbrahim İlyaslı, şair Ehtiram İlham çıxış edərək kitabdakı sənəd və materiallar toplu halında nəşrinin, layihənin istiqaməti olaraq dövlətimizin müstəqilliyinin 25 illik tarixində azərbaycançılıq ideyasının dövlət ideologiyasına çevrilməsi və uğurlu dil siyasətinin araşdırmaya cəlb olunmasının vacibliyindən danışıblar.
Bildirilib ki, Ulu Öndər Heydər Əliyevin müstəqillik dövründə banisi olduğu azərbaycançılıq ideyası dünya azərbaycanlıları arasında gerçək bir həmrəyliyin yaranmasını böyük bir stimul olub. Dünya azərbaycanlılarının Bakıda 4 qurultayının yüksək coşqu ilə keçirilməsi də bu ideyanın müasir dövrdə həyati bir məsələ olduğunu ifadə edir.
Qeyd edək ki, kitabın təqdimatı bundan öncə Quba şəhərində keçirilib. Nəşrin məsləhətçisi professor, millət vəkili Nizami Cəfərov, layihə rəhbəri Dəyanət Osmanlı, redaktorlar Şahyəddin Əliyev, Əkbər Qoşalı və İbrahim İlyaslıdır.
qhtxeber.az
Xəbərdən istifadə edərkən istinad etmək vacibdir.
