"Türkiyədə seçkiqabağı vəziyyət kifayət qədər mürəkkəbdir. Seçkilərin önə çəkilməsi ölkədə iqtisadi faktorların mənfi təsirləri ilə bağlı idi. Üstəlik Rəcəb Tayib Ərdoğanın bazasında elekterat dəyişikliklər müşahidə edilməkdədir”.

 

Bu sözləri Xeberle.com-a açıqlamasında politoloq Qabil Hüseynli Türkiyədə seçkiqabağı vəziyyətə münasibət bildirərkən qeyd edib. Onun sözlərinə görə, əgər Türkiyədə ikinci tur seçkiləri keçirilərsə, bu turda R.T.Ərdoğanın rəqibləri ona qarşı birləşə bilərlər:

 

"Beynəlxalq münasibətlər R.T.Ərdoğanın heç də xeyrinə formalaşmır. Türkiyənin NATO üzvü olmasına və NATO-nun təzyiqlərinə baxmayaraq Rusiya ilə yaxınlaşması, Rusiyanın Türkiyədən S-400 tipli hava hücumundan müdafiə sistemlərini almaq istəməsi münasibətləri xeyli gərginləşdirir. Keçirilən rəy sorğuları da Ədalət və İnkişaf Partiyasının (AKP) nüfuzunun hiss ediləcək dərəcədə aşağı düşdüyünü göstərir. Ümidvaram ki, seçkilər şəffaf və demokratik qaydada həyata keçiriləcək. Çünki Türkiyənin bu sahədə təcrübəsi və ənənələri var. Seçkiqabağı mühit gərginləşməsi və ikinci tur seçki probleminin ortaya çıxması mümkündür. R.T.Ərdoğanın başçılıq etdiyi və Milliyyətçi Hərəkat Partiyasının (MHP) da daxil olduğu "Cumhur İttifaqı” səslərin 40 faizə qədərini toplaya bilər. Əgər Türkiyədə ikinci tur seçkiləri keçirilərsə, bu turda R.T.Ərdoğanın rəqibləri ona qarşı birləşə bilərlər. Düzdür, hələ bunun kifayət qədər real olduğunu söyləyə bilmərəm. Amma hər halda nəzəri cəhətdən demək mümkündür ki, ikinci tur məsələsi yaranarsa, AKP-nin, "Cumhur İttifaqı”nın qələbə qazanma şansının xeyli dərəcədə aşağı düşmə ehtimalı var”.