Qanunverici orqanda təmsil olunan millət vəkillərinin əksəriyyəti bu gün müxtəlif ali təhsil müəssisələrində dərs deyir, ixtisaslaşdığı sahələrdə biliklərini tələblərinə öyrədirlər. 

Modern.az saytı bu gün hansı ali təhsil müəssisəsində necə deputatın çalışdığını öyrənib. 

Azərbaycan Pedaqoji Universitetinin (ADPU) mətbuat və informasiya şöbəsinin müdiri Mənsur İbrahimov bildirib ki, hazırda ADPU-nun Dünya Ədəbiyyatı kafedrasında millət vəkili Rafael Hüseynov 0.5 ştatla əvəzçiliklə çalışır. 

Azərbaycan Dillər Universitetinin mətbuat xidmətinin rəhbəri Zeynəb Kazımova: “Universitetin rektoru Səməd Seyidov Milli Məclisin deputatı və komitə sədridir. Eyni zamanda AŞPA Azərbaycan nümayəndə heyətinin rəhbəridir. Əvvəllər olsa da, hazırda ADU-da başqa millət vəkilləri bizdə işləmir. Belə isə müxtəlif tədbirlər zamanı bir çox komitə sədrləri və deputatlar qonağımız olurlar, mütəmadi olaraq universitetimizlə əməkdaşlıq edirlər”. 

Bakı Dövlət Universitetinin mətbuat xidmətinin rəhbəri Pərvanə İbrahimova hazırda BDU-da 11 deputatın dərs dediyini vurğulayıb. 
“Milli Məclisin deputatı Abel Məhərrəmov universitetin rektorudur. Bizdə çalışan başqa millət vəkilləri Asəf Hacıyev, Yaqub Mahmudov, Musa Qasımlı, Fəzail İbrahimli, Nizami Cəfərov, Əli Əhmədov, Rəbiyyət Aslanova, Bəxtiyar Əliyev, Kamilə Əliyeva, Ziyafət Əsgərovdur”. 

Azərbaycan Diplomatik Akademiyasından isə onlarda heç bir millət vəkilinin çalışmadığı qeyd edilib. 

Bakı Slavyan Universitetinin mətbuat xidmətinin rəhbəri Adil Əliyev bildirib ki, BSU-da iki millət vəkili dərs deyir. Bunlar Sahibə Qafarova və Sevinc Fətəliyevadır.