“Eldar Əzizovun yas mərasimləri haqqında qadağa verməsi barədə yayılan informasiyalar yanlışdır”. Bunu Xeberle.com-a açıqlamasında Sumqayıt Şəhər İcra Hakimiyyətinin  İnformasiya təminatı və təhlil sektorunun müdiri Ayaz İmaməliyev deyib.

“Yas mərasimlərindəki israfçılıqla bağlı vətəndaşlar, dindarlar tərəfindən İcra Hakimiyyətinə dəfələrlə müraciətlər daxil olub. Belə israfçılıq hallarının qarşısının alınması məqsədi ilə İcra Hakimiyyətindən tövsiyə xarakterli qərar qəbul olunub”.

Onun sözlərinə görə, tövsiyə xarakteri daşıyan bu qərarın qadağa ilə heç bir əlaqəsi yoxdur. “Bu tövsiyə şifahi halda verilib. Yəni israf hallarına yol verilməsə, daha yaxşı olar. Biz insanlar yas mərasimləri olanda, çətin vəziyyətdə qalmasınlar deyə, onlara tövsiyələr veririk ki, israfa yol verməsinlər”.

A.İmaməliyev deyir ki, bu qərar ictimaiyyətdə çox müsbət qarşılanıb: “Mənzil İstismar Sahəsinin (MİS) əməkdaşları da insanlara bu tövsiyəni çatdırırlar. Bu qadağa deyil. Qadağa qanunla tənzimlənməlidir, qanun qəbul olunmalıdır. Yas mərasimləri haqqında qanun maddəsi yoxdursa, biz necə qadağalar qoya bilərik?! Bu sadəcə bir tövsiyədir və ictimaiyyət tərəfindən də müsbət qarşılanıb”.

Qeyd edək ki, az öncə mətbuatda Sumqayıt şəhər icra hakimiyyətinin başçısı Eldar Əzizovun təmtəraqlı yas mərasimlərinə qadağa qoyması ilə bağlı xəbər yayılmışdı.

Xeberle.com